前晚，美國公布十一月工廠訂單升1.8%，好過市場預期的1.7%，不過十二月ISM非製造業指數意外回落，加強市場對聯儲局維持低息之預期，十年美債息收2.96厘，回順0.03厘，華爾街三大指數偏軟，跌幅介乎0.25至0.44%，依然不脫大漲小回格局。

太陽日誌

綜合大行預測中建材業績（人民幣）

睇見中港兩地股市指數認真唔開胃，人仔拆息落番晒一樣唔掂，滬綜指跌落去年八月低位2,029點，先勉強見技術反彈，最後升得1點，收2,047點。

克強經濟學對經濟增長放緩的容忍度，睇落去愈來愈高，加上今年內地逐步實現利率市場化，而叫停長達一年半的IPO市場亦重啟，一句唔該被國際投資者作對中字派「長空萬里」的藉口，連大鱷索羅斯都出口術，話擔心一四年環球經濟不明朗因素來自中國而非歐洲。

IPO吸引基金換貨

到底IPO重啟有幾大影響？今年預計有超300間公司排隊喺A股上市，粗略估計全年有5,000億至1萬億人仔被公仔紙吸走，等於每星期96億至192億人仔，都真係唔講得笑，有迹象見到券商為省靚招牌，一月打頭陣的一批伸手黨質素普遍較佳，吸引到唔少基金換貨，估計同近期A股弱到離晒譜有關。

尋日國指被兩隻內險及石油股拖住後腳，跌54點，收報10,236點，尚幸恒指仲有非中資類股份撐場，表現好些少，恒指收市升28點，收22,712點。

魚缸愈趨兩極化，幾倍PE國企無人吼，幾十倍PE博彩及中國新經濟概念股驚死買唔切，最弊短期睇唔到有逆轉的催化劑，網絡、環保、新能源同醫藥股，或者部分保守投資者會覺得貴到開始要警惕，但現實世界無人有預知未來的水晶球，怕輸但更怕執輸，較合理做法係做好賺頭蝕尾心理準備，入市前定好一個可以承受的止蝕位。

正面因素逐漸浮現

仲係放心唔落，恐怕只能在超賣實力股中搵反彈機會，水泥股自上月初至今累積跌幅唔細，兩隻領袖股中建材（03323）及海螺（00914）輾轉由高位分別跌15%及19%。事實過去兩年，水泥股的投資氣氛麻麻，行業嚴重供過於求造成水泥價格疲弱，行業毛利率持續受壓。

不過，隨着中央加大整頓中小型水泥企業力度，提高環保節能等的產業標準，低效益產能陸續被淘汰，及保障房及城鎮化計劃，對水泥業的正面助力逐漸浮現，市場都估幾隻水泥龍頭，今年毛利率會比一三年有所改善。

中建材過去幾年的擴張步伐過急，三年複合產能年增長近三成，遇上冷風，公司已調整策略，今年起以改善毛利率及資產負債表為先，今、明兩年資本開支會由去年高峰的260億元（人民幣．下同），回落至每年90億至100億元，近期水泥價格有見底回穩迹象，估計春節後季節性需求回升，水泥價看漲。水泥股最壞時刻已過，有冇燒鵝味道見仁見智，但肯定係蔗渣價錢，中建材一四年PE得5倍，近期已將十一月中升幅消化八成，諗得過。