上周五港股急挫逾500點，恒指終於有較大波幅，但其實跌市之中仍有不少股份逆市向上，恒指急跌主要受重磅中資股拖累。

歐美市場復甦勢頭明顯，為思捷業務帶來增長動力。（資料圖片）

正所謂「一個銀仔有兩面」，當年國企紅籌股熱炒，恒指成分股中資成分股比重日漸增加，冇人會有意見；到如今A股仍處黎明前的黑暗，中資股疲弱拖累恒指表現，有怨言指恒指未能反映市場實況，促檢討中資股比重，甚而另設板塊指數供炒家參考。阿莊就認為，呢幾年的超低息環境鮮見，經濟周期亦受影響，但恒指按季檢討有既定機制，行之有效，若然呢期興果瓣就加果樣，指數會變得極為波動和投機性，未必就可以更好地反映經濟實況。

地緣風險不容輕視

時值年初，少不免要請高人指點迷津，展望明年大局。尋日就聽一位高人話，以農曆計，未來一年係甲午年，亦即係甲午戰爭120周年，將會係動盪的一年，並叫筆者要提高風險意識。

翻查資料，一八九四年中日甲午戰爭在七月開始，咁講法，會唔會係七月前後，中日兩國關係會再度緊張，甚而擦槍走火？此外，近期北韓局勢並不尋常，亦令人不安，總之甲午年區內地緣政治風險不容忽視，看官宜有所防範。

本來諗住美國退市會有好大殺傷力，點知講咗成年，投資市場有哂心理準備，暫時未見市場有過激反應。過去兩年，恒指每年高低波幅都有四千幾點，而當恒指14日RSI落到30樓下就係買貨時候，值得投資者參考。

綜合各項因素，一四年第二至第三季初前，A股或有較大波動，較明顯升勢在下半年才開始出現，期間恒指繼續搓波，主戰場仍停留在玩板塊「對對碰」。想為中資股弱勢做對沖，可揀歐洲復甦概念股思捷環球（00330）押倉，中長線應有不俗回報。

從資金流角度，近季資金由新興市場流出，轉投歐、美市場的趨勢已不是新聞。再講，歐債危機已告一段落，從近日歐洲債息表現便可見一斑，西班牙十年債息跌至逾三年低位，意、葡債息亦見回落。主營的歐洲市場基本面確認回穩，為思捷的業務復甦帶來有力支持，拖累股價的其中一個重大不利因素既已消除，估值有改善空間。

還記得思捷前大股東邢李火原在一二年末季增持思捷股權至逾5%。大戶無寶不落，相信冇倍計的目標回報，都唔會輕言動身入場翻兜。思捷現價15.86元，有心唔怕遲，先落首注，大成交升穿18元再加注，年內目標挑戰23元水平，失守12元止蝕，計落都值博！