今個星期五將有兩幅地皮截標，其中觀塘商貿地雖再加入「禁拆售」條款，但係東九龍商業區極具發展潛力，再加上近排同樣唔准賣散嘅九龍灣商貿地都以理想價賣出，估計今次截標反應都唔會差。劉Sir八到，區內「大好友」億京發展經已率先表態會研究入標，該地估值最高大約39.62億元。

億京發展黎裕宗表示，集團會研究入標爭觀塘地。（資料圖片）

觀塘恒業街商貿地佔地約5.5萬方呎。（資料圖片）

本周五截標的觀塘商貿地及火炭住宅地資料

億京發展黎裕宗同劉Sir講，呢幅觀塘恒業街、偉業街、欣業街與觀塘道交界商貿地日後落成後唔畀賣散，或多或少會影響出價，不過都要視乎發展商點睇，如果「睇長線」都有唔錯前景，而且直接透過政府投地會較補地價簡單，所以集團會研究入標競投。

受惠東九 估值39億

劉Sir知道，政府致力拓展東九龍商業區，近年都主動賣咗唔少商業地，好似喺舊年十一月批出嘅九龍灣宏照道與臨利街交界商貿地，更首次加設禁拆售條款。

市場原先都唔係咁睇好，但喺缺乏參考對象下，幅地都吸引咗17家財團入標，仲以接近估值上限嘅26.38億元批出，平均每方呎樓面地價約4,753元。

所以韋堅信測量師行林晉超都話，呢幅觀塘商貿地皮位處東九龍商業區，就算只可以用作收租，財團嘅參與度應該都會唔錯。據了解，地皮市場估值約26.41億至39.62億元，每方呎樓面地價大約4,000至6,000元。

火炭住宅地反應料佳

至於同日截標嘅沙田火炭樂林路住宅地規模有限，佔地大概1.28萬方呎，總樓面都係講緊約2.69萬方呎。

劉Sir老友高緯環球張翹楚話，呢幅住宅地質素唔錯，將來「食正」港鐵沙中線效應，加上附近無乜新盤做競爭對手，估計截標反應唔會差。

不過，地皮做價唔會高過沙田九肚傳統豪宅區，張翹楚估計呢幅火炭住宅地樓面呎價約7,500元，折合地皮估值約2億元，係市場估值嘅中位數，現時市場估值就介乎約1.69億至2.15億元不等。