本港奢侈品消費額下跌，加上部分有代表性嘅品牌進駐二、三線街，高緯環球估計明年中環及銅鑼灣一線街舖租金跌5至10%。但主打大眾化時裝市場國際品牌，就依然積極响一線街落腳。據悉，H&M正洽租銅鑼灣恒隆中心商場，希望打造成港島區旗艦店。

消息稱，銅鑼灣恒隆中心商場獲國際時裝品牌H&M洽租，計劃打造成旗艦店。

高緯環球胡詠詩（左）預計，明年中環及銅鑼灣一線街舖租金跌5至10%。

主要購物區一線街舖租金預測

劉Sir同高緯環球香港商舖部執行總監胡詠詩傾開，佢話中環同埋銅鑼灣一線街舖租金，喺今年第四季已經跌咗2%，因為唔少國際奢侈品擴張步伐保守咗，有啲品牌仲落戶二、三線街。

中環銅鑼灣料跌得最甘

好似最近有知名時裝品牌喺中環荷李活道開店，佢預計，明年全年中環同銅鑼灣一線街舖租睇跌5至10%，跌幅係幾個核心區中最大；而尖沙咀區一線街估最多跌5%；旺角則持平。寫字樓方面，該行香港董事總經理蕭亮輝話，九龍東商廈新供應持續增加，預計明年該區商廈租金亦會下跌8%。

不過，有代理朋友預期明年舖位交投量會好轉，利嘉閣（工商舖）商舖部柯偉良話，市場對於政府嘅辣招已經慢慢適應，過去積壓嘅資金開始釋放，加上相信唔少業主會提供稅務補貼優惠等去吸引客戶，預期明年整體商舖嘅交投量可以回升10%，至約4,400宗水平。

H&M洽恒隆中心做旗艦

市況雖差，但有國際品牌都照搶舖，據悉，知名服裝品牌H&M洽租同區恒隆中心商場，希望打造成港島區旗艦店。

聽聞依家幾層合共約4萬方呎嘅商場樓面，將會重新組合成一個多層嘅複式巨舖，意向月租約1,000萬元。

劉Sir向發展商恒隆（00101）方面查詢，佢哋回覆集團會不時優化租戶組合，為消費者帶來嶄新體驗，同時提升物業價值，至於具體嘅租戶優化計劃，就未有資料公布。

劉Sir啱啱收到風，銅鑼灣怡和街有個原由電訊公司租用嘅地舖，業主本來意向月租約80萬元，比起舊租高約一倍，個舖吉咗約一年後，早排租咗畀條街另一間電訊公司，月租約40萬元，呎租約400元，同舊租租金差唔多。