Fundman睇市：燃氣股 有勢再爆升

尋日港股全日得103點波幅，收市跌66點，報23,744點。年底前大堆IPO排隊上市，咪話對市況無影響，單係今個星期，九隻新股截飛，大市成交529億，非戰之罪也。凍資王信達資產（01359）今個星期四掛牌，還望到時釋放一些資金後，個市氣氛可以好番些少。幾隻IPO之中，唔少新股客熱搶殯儀股福壽園（01448），但考慮到落埋孖展都未必分到好多下，個人反而比較睇好投機味無咁濃、台前幕後班底信得過、兼且認講反應無咁熱烈的海螺創業（00586）。

網遊股只宜炒短線

基金經理捧新股，形成魚缸熱錢高度集中於消息身上。被阿里巴巴寵幸，齊齊去搞物流的海爾電器（01169）再升7.1%，報22.55元，唔知有冇其他具備全國配送物流條件的家電商會照辦煮碗？彈珠機股DYNAM（06889）早市以為要回，點知午後拗腰，收市倒升3.7%，報29.15元。賭股外，網股依然是炒家焦點，前日離奇開480元整支大陰燭的騰訊（00700）升0.8%，報466.2元；雲遊（00484）升1.4%；博雅（00434）升8.1%創新高；IGG（08002）升4.1%。

真係世界變，今浪前，遊戲開發公司一般估值都唔高，南韓美國同業往往只係十多倍PE，主要基於電子遊戲周期短，要做到騰訊般能夠長期漁翁撒網，推出大堆遊戲博有三幾隻跑出，唔輕易模仿。不過，既然個市唔講理由，幾隻半新股亦都被大孖沙收到乾晒貨，看官們總之清楚依家係炒個勢，唔係同佢做人世就得。

近日祖國霧霾天氣嚴重，天氣預告白茫茫的PM2.5，好可能會殺到落廣東，加快潔淨能源應用，是中國政府改善霧霾情況的治本之策。在國策扶持之下，預料十二五期間的城市天然氣需求，將會比十一五時翻一番。天然氣同燃炭、石油的最大分別，係天然氣燃燒後只會產生二氧化碳及水，對環境染污的程度相對低得多。近排見燃氣股亦相當應節，由十一月中起步，升勢平平穩穩，也更多大行加入唱好。尋日美銀美林報告估計，預測明年內地管道燃氣需求，將維持12至15%的理想增長，去到1,650億至1,700億立方米。

由於燃氣價較柴油保持近三成折讓，估計今年使用天然氣的車輛會比去年大增四成，至10萬架，有利從事氣站生意的昆能（00135）及新奧（02688）。另外，筆者亦睇好中國燃氣（00384），企穩10日線有再爆升勢頭；港華（01083）亦似在8.5元搵到支持，短期有條件挑戰早排做出的9元高位。