香港核心零售區街舖呎租連續五個季度蟬聯全球最貴，商戶要留守一線核心街道，真係唔容易。早排租咗羅素街多年嘅國際連鎖餐廳頂唔住貴租要搬走，剩番有能力留低嘅都係內地旅客喜愛嘅化妝品、時裝同鐘錶類商戶。啱啱收到風，一家美國化妝品店剛決定以高出舊租逾兩倍嘅租金，續租羅素街舖位，呎租近2,700元。

銅鑼灣羅素街有地舖獲每月約一百六十萬元續租，反映租戶對該區後市有信心。（資料圖片）

今年銅鑼灣羅素街地舖租賃個案

有代理同劉Sir講，一間國際連鎖餐廳早喺○六年已租用羅素街8號地下部分及1樓，今年初畀間本地化妝品店以每約160萬元預租踢走。而該街道已經大部分由內地人喜愛嘅化妝品、時裝同鐘錶類商戶佔據，啱啱就有美國化妝品商戶以高租金續租留守。

中環餐廳舖漲租57%

佢話呢間商戶早喺十年前已進駐羅素街，間舖對正時代廣場，人流絕對有保證，加埋英皇國際（00163）重建中嘅巨舖喺附近，將來毗鄰租客必定係國際級大商戶，到時一定仲旺，所以該化妝品商戶不惜每月豪擲約160萬元續租，較舊租金大幅高出約2.2倍。

近年中環開始變身成國際時裝街，間接帶旺附近街舖租金。有間餐廳都擔心業主大幅加租，近排決定續租現租用嘅威靈頓街雙號地舖，新租金每月約110萬元，升幅約57%。

藥房呎租170搶荃灣舖

另外，有間日式壽司店喺荃灣積極開新店，過去約一、兩年間已喺該區開設3間分店，依家又租咗沙咀道雙號地舖連閣樓，月租金約20萬元。至於同區有食街之稱嘅荃興徑，早排該街一個原由食店租用嘅雙號地舖，租約完結後，即時畀藥房租咗，月租金5萬多元，呎租約170元。

有代理報料，有「電訊王子」稱號嘅投資者羅珠雄，早排賣咗新蒲崗六合工業大廈地廠，涉資約1.158億元，揸咗約一年半，帳面袋約3,900萬元。