屢創新高的美股見爭持，前晚華爾街三大指數收市變動唔大，港股在結算前夕，繼續以時間消化短期超買，自上周一急升627點之後，六個交易日有四日跌市出現，然而恒指昨日收市點數23,681點，依然高於上周一收市的23,660點，反映基金經理儘管無即市衝動去挑戰24,000點阻力，但同時指數在高位沽壓唔算大。

太陽日誌

綜合大行預測南航業績（人民幣）

昨日恒指跌3點，報23,681點，受MSCI亞洲區指數變動影響，大市成交增加至679億元，其中三隻受指數變動影響的股份：瑞聲科技（02018）、中石化煉化（02386）、漢能（00566）入晒成交榜前列，加埋錄得40億元成交，相當熱鬧。

首日掛牌的原生態牧業（01431）潛水，收2.6元，比招股價2.7元低0.1元，變相幫近期炒得火熱的乳業股沖番個凍水涼，蒙牛（02319）跌0.8%，雅士利（01230）跌2.1%，輝山乳業（06863）跌2.6%，唔知係咪業務性質最相近的關係，現代牧業（01117）插得最深，跌3.4%。比較估值，原生態搵到短期支持後，相信短期值博率仲係高於現牧。

鳳凰醫療一股難求

532倍超購熱到爆的鳳凰醫療（01515）周五掛牌，預算今、明兩日散戶就會知分配結果，尋日個市悶悶哋，搵個賓架問問，老友劈頭第一句話今次「衰過乞」，話配售結果不足入飛股數0.1%。看來今次大超額下回撥五成番去IPO，基金在配售部分真係攞唔到幾多貨，難怪缸邊有細飛中籤率奇高的傳聞，分到散晒底下，周五掛牌仲得唔得就真係難估。

近排六福（00590）及周生生（00116）走勢都幾強，尋日收市後周大福（01929）公布中期業績，純利35.09億元，增長92.3%。睇番今個月幾間大行的預測，營業額及內地同店銷售稍低過預期，但因毛利率意外地有輕微改善，使最終盈利高於預期。姑勿論點，中期成績交到綜合大行全年預測66億元的53%，業績有被重估條件，短期股價應可突破近期在12至13元窄幅上落的悶局。

近期伊朗就核問題同西方國家的分歧緩和，加上美國頁岩氣開採技術日益成熟，環球能源價格無因為多國央行持續量寬而做好，國際油價自八月見過112美元高位後，輾轉番到95美元樓下，一季之間調整近一成五。加埋近期人民銀行行長周小川提到未來擴大人民幣波幅，言論等同為新一輪升值潮作預告，對有較多外幣債務的航空股有利。

事實上，回顧東航（00670）、南航（01055）兩隻比較當炒的航空股，一二年第四季業績見底後，季績持續有所改善，東航由去年第四季蝕6億元（人民幣．下同）到今年第三季賺28.5億元，南航也由去年第四季蝕0.4億元擴大到上季賺21.5億元。

值得留意，今年航空股出奇滯後，東航六月先見底，南航到近期資金搵落後股埋手，方見急升。東航、南航一三年預期市帳率估計1.12及0.76倍，較十年平均的3.43及1.45倍分別折讓67%及47%，看來起飛條件經已充分，搵落後股的看官不妨望多兩眼。