起動九龍東刺激下，區內新建工廈都紛紛「起革命」吸客。就以觀塘鴻圖道35號天星中心為例，該新落成工廈設有市場罕見嘅連平台及複式等特色單位，每層單位樓高達約4.2米，比起一般工廈還高出超過1米。大廈同時加入商廈至有嘅環保節能設施等元素，該工廈早前一個頂層複式呎價就近8,000元，創全港工廈呎價新高紀錄。

觀塘天星中心提供4個連平台單位，每個平台面積由約132至941方呎不等。

第一集團董事霍偉良表示，天星中心兩個複式單位均設有內置樓梯及平台。

觀塘天星中心買家資料

近年發展商陸續响觀塘興建寫字樓，但重建工廈唔多，其中賣樓花時呎價去到近8,000元嘅鴻圖道工廈天星中心，劉Sir趁佢入咗伙，上去睇下有咩特色。

搭升降機兼可睇新聞

入到大廈大堂，見到地台同牆身都係雲石鋪砌，三部升降機內都有小型電視屏幕，嚟緊會即時播放財經資訊，唔講唔知係工廈，以為係商廈。

幢工廈最大特色係有4個連平台單位，其中兩個屬標準戶，分別喺5樓及7樓，每個平台面積各約941及397方呎。另兩個係複式戶，分別喺31樓及32樓，與33樓及35樓，平台面積就各約132方呎及200方呎，同現時住宅新盤特色戶嘅平台差唔多咁大。

提起天星中心嘅買家都星光熠熠，其中，33樓及35樓頂層複式戶舊年九月畀漫畫家馬榮成買咗，金額約7,351萬元，單位面積約9,246方呎，平台面積約200方呎，呎價達約7,950元，到依家仲企穩全港工廈呎價最高。

環保節能 電費慳一筆

而天星中心個名由來，係嚟自城中知名經理人陳淑芬及有關人士，佢哋舊年豪擲約2.4億元，連命名權掃入該廈5樓連平台戶等共8層，並以佢旗下天星娛樂有限公司名稱命名。

工廈一向畀人印象係簡陋同陰暗，發展商第一集團董事霍偉良同劉Sir講，市場嘅環保意識愈嚟愈重，所以天星中心全幢單位同公共地方都裝上LED燈，比一般商廈每年可慳番七成電費開支，大廈外牆配以折射玻璃隔熱，大大降低室內溫度，少啲開冷氣，可慳番三成電費。佢仲話幢大廈每方呎建築費差唔多2,500多元，比起傳統工廈建築費高近四成。

近年新建工廈都加入好多新設計同包裝嚟吸客，其中，億京發展嘅荃灣區TML廣場及會德豐地產同區嘅ONE MIDTOWN，物業大堂均以高樓底設計，亦鋪設雲石等，提升物業形象，近期二手成交呎價均亦已升至約5,000多元水平，成為區內工廈新指標。