一線街舖租金升幅慢咗，內地旅客來港勢必幫襯嘅藥房就乘機擴充，聽講有間藥房傾緊喺全球舖位呎租最貴嘅銅鑼灣羅素街落點，睇中一間依家由二手名牌貨品專賣店BRAND OFF租緊嘅該街道60號地舖，上址現市值月租估計近130萬元，呎租2,100幾元。雖然同依家租金只高近20萬元，但過百萬元月租唔係咁多商戶畀得起。

內地旅客購物常到的銅鑼灣羅素街，最近有地舖獲洽預租。（資料圖片）

近月藥房搶租零售核心區街舖個案

內地客聚集 生意必旺

內地旅客嚟香港買貴嘢嘅比例少咗好多，不過買奶粉、藥油同藥材就有增無減，所以藥房愈開愈多，有代理同劉Sir講，一向係國際鐘錶珠寶店天下嘅羅素街，其中已劃作行人專用區嗰一段，成日有內地客停低等朋友。

有間藥房就睇中呢點，依家傾緊預租該街道60號地舖，上址面積約600方呎，BRAND OFF舊年年中開始租用，租期出年第二季先到，個舖依家市值月租近130萬元，同個舖目前月租金約110萬元比，每月僅多近20萬元，升幅只係約18%，同旺市時租金以倍升，已經溫和好多。

有間私人拍賣行將推出深水埗深の都6個迷你樓上舖下個禮拜拍賣，開拍價30萬元起，其中1個1樓單號舖，睇返土地註冊處資料，物業○五年以約127萬登記買入，依家開價大幅低76%，分分鐘蝕入肉。

深水埗奀舖低76%開拍

早前北角城市金庫有「劏場」舖買家趁今個月底上會前賺少少即走，聽講該商場地庫一個單號舖，面積約68方呎，業主今年七月以163萬多元購入，啱啱以約165萬元「摸出」，帳面拾兩萬元，計埋佣金等開支，好彩的話就平手。

另外，有代理話，有投資者一口氣放咗銅鑼灣銀座商場地庫最後10幾個舖，每個售價約170萬起，平均呎價3萬多元，為咗吸引收租客，買家首兩年每年有約6厘租金回報保證。