今年四月底實施一手銷售新例，搞到第二季新盤市場水盡鵝飛。不過，發展商喺第三季起發力追數，新盤銷售轉旺。有份代理報告顯示，預計今年落成嘅住宅私樓，都賣咗近五成一，只係比起舊年賣咗逾六成一，兩者只係相差約十個百分點，相信今季新盤成交會多好多。有代理料一手將帶動十、十一月整體物業成交量回升去約每月六千宗。

戴德梁行陶汝鴻（右）表示，發展商為新盤提供稅務補貼優惠有助成交量回升，但對二手住宅會構成壓力。左為高偉雄。

近期新盤加速推售，吸引不少用家及投資者陸續入市。（資料圖片）

一手私人住宅待售單位統計

料成交每月六千宗

中原研究部黃良昇同劉Sir講，今年可望有超過萬三個私樓落成，其中未賣有三千二百幾伙，貨尾就唔夠三千三伙，加埋大概六千四伙，佔全年落成量四成九多啲，賣出嘅比例接近五成一。睇番舊年同期紀錄，落成就有約一萬○七百伙，同期售出比例就超過六成一，今年比舊樓嘅售出比例只相差十個百分點，睇嚟新例對一手影響，都唔係好似想像中咁大。

戴德梁行陶汝鴻又話，今年樓市風聲鶴唳，先有年頭嘅樓市雙辣招，四月底又有一手新例，搞到大家對樓市好審慎，所以第三季總體樓宇成交平均每個月只得約莫五千幾宗，仲衰過○三年沙士嗰陣。

不過，呢排新盤陸續為買家提供稅務補貼優惠，見到用家同投資者都陸續出番嚟買樓，所以預期十月同十一月樓市會好番好多，整體成交量可以達到每月六千宗水平。

逾億元大刁急縮36%

另外，該公司高偉雄就話，今年第三季過億元嘅大額成交，就得番27宗，比起第二季42宗，足足唔見咗近三成六，成交金額就少咗近四成三，第三季錄約莫七十五億，其中豪宅、分層寫字樓及商舖買賣，按季少咗由六成六至七成七。

不過，工業、地皮同酒店交易，就按季有增長，所以預期嚟緊個市會好番好多，尤其酒店同可以起酒店，或者寫字樓嘅地皮，好多投資者都有興趣，相信年尾前會有唔錯表現。