SUN勢力：百麗復甦因素未反映

百麗國際（01880）今年上半年盈利下跌3.3%至21.67億元（人民幣．下同）。不過，在芸芸內地零售股中，此份成績表已唔失禮，且公司勝在業務清晰，併購都是具協同效益的同類產品。跟去年下半年作比較，上半年盈利跌幅已有所收窄，且截至今年六月持銀行結構存款、定期存款及現金95.41億元，只有短期借款21.27億元。

早前管理層睇下半年銷售仲淡過市場，反而唔少券商認為百麗正逐步改善，包括高盛、瑞信、里昂、花旗等給予買入或優於大市的評級，原因之一是其業績表現在內地整個消費大氣候中已算突出。

百麗由七月低位反彈，數次觸及12元樓上都無力再上，彈幅唔超過兩成半，輸畀炒業務翻身的體育用品股。百麗以鞋類產品為主，同時經營運動品牌服飾銷售，上半年相關店舖數目佔逾三成，相關業務復甦的因素，似乎仲未反映在百麗的股價上。