愈來愈近十七號美國國債觸頂死線，美國共和黨幾乎可以肯定在今次黨爭上輸鋪勁，提出的折中方案唔係畀總統奧巴馬否決，就係連黨內也未取得足夠共識，分歧嚴重。一直表現樂觀的華爾街，終於見有少少「騰」，前晚道指急跌133點，報15,168點，啱啱收復的50日線15,170點又再度失守，評級機構買定保險，惠譽先把美國三條A的債評列入負面觀察名單，意味萬一美國出現局部違約，可能會下調美債評級。

太陽日誌

大行預測國美業績（人民幣）

九月中國出口數字奇差，估唔到A股兩日後先至有反應，滬綜指昨跌1.8%或者40點，報2,193點，導火線係安信証券預測第四季中國經濟增長幅度會差過第三季，建議A股玩家十月下旬開始減磅，結果係個市踏入下旬第一日，就已經倒水一樣。

港股又玩日升日跌格局，成交縮到得545億，恒指以全日高位23,350點開出後陰陰落，最低見過23,128點，最後收23,228點，跌108點，期指成交由前日3.5萬張彈返去近5萬張，睇嚟基金經理在美國債限前夕，更積極以期指為手上現貨進行對沖，即月期指收23,210點。

有線提防炒過龍

免費電視發牌結果有人歡喜有人愁，魔童的香港電視（01137）開市前出通告裁員止血，股價一樣重挫三分之一，收2.03元創今年新低；有線寬頻（01097）喪升1.55倍，收1.2元，成交12.5億元，睇急升後市值不過24億，等同半間公司響魚缸內碌了一轉，認真誇張。以觀眾立場，感到有線近年無論業績或者上客表現，都過分依重英超轉播，事實擺在眼前，公司已經連蝕五年，九九年10.39元上市，死忠捧場客九碗水煲埋一碗認真夠杰！以香港彈丸之地，媒體根本面對市場寬度有限的困難，一直係Winner gets all（贏家通殺），加埋依家仲有Youtube等其他選擇可以「送飯」，股民對個兩個牌咁樂觀，筆者確實是始料不及。

銀泰（01833）昨日逆市造好，升2.9%報8.37元，原因是獲大摩唱好，指其股價未來六十日上升機會達七至八成。公司日前公布的第三季銷售，錄得14.2%增長，雖然同店銷售增長由上半年的13.7%進一步放緩到11%，但已經好過得單位數的金鷹商貿（03308）多多聲，更遑論百盛（03368），估計股價或有機會番上50日線8.8元樓上。

國美電器（00493）預告首九個月轉虧為盈，第三季淨利率潤率會比第二季進一步改善，主要受惠實體店銷售收入增長及綜合毛利率有所提升，股價高見1.23元，創超過一年新高，收市升6.2%，報1.2元。

上半年國美業績已虧轉盈，由去年中期勁蝕6.07億（人民幣．下同）變成今年賺3.22億，只要無乜頭暈身慶，第三季盈喜是預期之內。早前有大行路演文件預測網上業務止血速度比市場預期更快之外，內地反貪腐下經濟吹淡風，令商舖租金升勢冷卻，對國美的幫助更大，電子商貿業務據知今年底明年初有望達到收支平衡，加埋火鳳凰故事，市帳率只及對手蘇寧A股的四分之一，難怪基金咁捧場，尋日四百幾球成交破位，相信上面仲有水位，短期繼續昅實。