環球經濟走勢麻麻，跨國財金機構雲集嘅中區寫字樓，租金壓力自然最大。有代理老友話，上季度區內超甲級加埋甲級寫字樓，平均呎租97元都唔夠，按季跌0.2%，係唯一錄得跌幅地區。不過由於區內唔少業主唔肯劈租，所以估計今年全年該類商廈租金跌幅只有2%，同今年初估計大跌10%，無預期咁慘。另金鐘力寶中心一個月三度錄得呎租新低，一個中層戶尋日僅以每方呎38元租出。

蕭亮輝（左）認為，若外圍經濟轉好，中區寫字樓租金可望未來兩、三季內止跌回穩。右為霍佐平。

各區甲級寫字樓上季租金及預測走勢

上季待租率達7.1%

高緯環球香港董事總經理蕭亮輝同劉Sir講，歐美經濟負面消息層出不窮，上季整體甲級寫字樓市場有15.7萬方呎樓面未獲承租，待租率達5%。而中區待租率仲高，有7.1%，所以租金壓力最大，加埋上兩季仲有唔少單位推出頂租同退租，中區寫字樓租金最受影響。

按季平均租金惟一錄得跌幅嘅中區超甲級同甲級寫字樓，上季平均呎租只約96.7元，同第二季比，跌咗0.2%，若同今年初比，更加跌咗1.7%，估計本季再跌多0.3%，而全年跌幅估計約2%。

港租金開支冠亞太

由於業主持貨能力強，寧願交吉等客，同埋加佣畀代理搵客，所以全年租金跌幅無今年初估嘅跌10%咁多。該行香港商務部執行總監霍佐平話，區內超甲級寫字樓之一嘅國際金融中心2期，依家待租率只有單位數字，平均每方呎叫租約150元，同今年初比低咗10元，呢類超甲級寫字樓上季平均呎租約103.5元，料全年跌2%，同今年初估計跌12%，跌幅明顯收窄。

力寶錄得呎租新低

霍氏同劉Sir講，雖然香港寫字樓租金跌咗，但喺亞太區主要城市中，租用開支仍然最高，平均每方呎差唔多87元，第二高係北京。

有代理話，剛租出嘅力寶中心1座有中層戶，面積近2,100方呎，月租8萬元唔使，呎租只38元，原來該廈低層戶本月初以每方呎39元租出，2座一個更低層戶上月中呎租仲有40元，甲級寫字樓租金真凍過水。