兩幅新界小型限量住宅地皮會喺今個星期五截標，分別係屯門湖安街及沙頭角順隆街限量地。劉Sir知道，屯門未來仲有唔少地皮推出市場，不過，有測量師老友覺得對地價無乜影響，事關屯門區地價一向都係「穩定地低」，都好難跌穿三千關口，預期屯門限量地每方呎樓面地價約3,150元，估值約3.72億元。至於沙頭角限量地估值最多約莫2.72億元。

屯門湖安街地皮須提供最少二百二十個單位。（資料圖片）

本周五截標兩幅限量住宅地資料

屯門有望成為政府未來主力推地嘅地區之一，劉Sir知道，近年批出嘅土地都不乏屯門地皮，單計今年已先後批出4幅同區地皮，包括掃管笏及虎地等，成交樓面呎價約3,241至3,895元。上述屯門湖安街與湖康街交界限量地，位置比較靠近屯門碼頭一帶屋苑，係呢個區域較少有嘅供應。

住宅地公屋包圍欠吸引

事實上，今季賣地計劃再有4幅屯門地皮供應，高緯環球張翹楚就覺得，屯門地價向來已經「穩定地低」，所以再跌空間唔大，再者區內地皮供應數量雖然較多，但每幅規模有限，對地皮價值影響不大。佢仲話，呢幅地皮景觀唔錯，但周圍有唔少公營房屋，所以吸引力會比掃管笏一帶遜色，但相信呎價難跌穿3,000元水平，估計樓面呎價大約3,150元，折合估值約3.72億元。

呢幅限量地非住用樓面最多約7.2萬方呎，若以純住宅發展，住用樓面最多約莫11.8萬方呎，規定興建唔少於220個單位，但最終住宅及非住宅樓面比例仲有待釐訂，不過項目須提供長者日間護理中心。

非主流區域 競投未必勇

而沙頭角順隆街與順昌街交界限量地，位處邊境禁區範圍，不過，劉Sir相信若該區持續進行住宅及社區發展，禁區有機會逐步放寬，地皮限建最少240伙，估值最高約2.72億元，樓面呎價約2,100元。

此外，韋堅信測量師行林晉超講到，呢兩幅土地均位於非主流地區，對大型財團嚟講關注度會比較低，加上最近觀望氣氛濃厚，競投未必會太熱烈，不過地皮涉額唔係咁大，相信仍可以吸引部分財團入標。