Fundman睇市：招商局有條件再升

期指結算日，港股反彈180點，收21,704點，主板成交縮到507億元。九月期指尋日市收21,560點，低水145點，扣番除淨因素，比合理值低水40點。暑假進入完結階段，但唔少芬佬仍遊埠聚緊天倫，今日基金月結未必有大時代，好大機會都係睇住外圍走。

聯想分拆有得諗

內地手機生產商小米，放料由Google的Android系統開發團隊中，撬走副總裁Hugo Barra，令借殼金山軟件（03888）的消息又再舊聞新炒，金軟股價升7.5%，報16.82元，創歷史新高。內地傳媒話小米企業價值達100億美金，即780億港元，換句話，仲大隻過金軟加埋富智康（02038），兩者市值分別為198億及373億元，總之誇到無朋友。

以上半年小米智能手機出貨量703萬部計，相當於同期聯想（00992）出貨量1,980萬部的三成五左右，尋日聯想市值仲差些少至夠100億美金，如果小米咁值錢，聯想就更加抵買，7.52元買落去，等於三成五智能手機生意價值，其他PC及平板硬件生意免費，睇嚟聯想真係要諗諗分拆手機生意上市！

個市炒無可炒，港口股突見火燒冷灶。上海建自由貿易區、大行估下半年中國外貿數字回升、國家主席習近平在遼寧大連考察，都成為炒作理由。招商局國際（00144）升9.7%，天津港（03382）升7.5%，大連港（02880）升7.4%。招商局就啱啱出咗業績，上半年賺19.35億元，升10.2%。期內，集裝箱吞吐量3,266萬TEU，升11.8%，散雜貨吞吐量1.77億噸，升8.8%。睇番上半年，中國規模以上港口完成集裝箱吞吐量9,147萬標準箱（TEU），按年升8.3%，以此比較，招商局的表現優於同業。

大行估招商局全年賺41.41億，市盈率15.1倍，○九年前中國進出口貿易一直維持高增長，招商局往績PE可去到20至26倍之間，目前低估值正反映貿易量放緩的實況，若第三季是內地出口黎明前的黑暗期，招商局股價有條件再上，如PE重返四年平均值16.9倍，可見28.5元左右，不過這隻平時beta較低的股票，尋日升咁多，捧場客或可等落番24至25元之間至考慮。