「辣招」推出半年以來，咪以為眾投資者停晒手，紀惠集團廖偉麟早排靜雞雞首度去咗日本尋寶，已經鎖定大阪及東京各一件商用物業，每項涉資4至5億元，短期再去美國考察，預計今年海外投資額加埋約二十億元。同時，有班本地大學生原本想買荃灣DAN6工廈樓花，亦都轉軚買英國曼徹斯特一個開放式單位收租，涉資63萬元，貪佢租金回報保證每年有8厘。

紀惠廖偉麟正研究東京與大阪各一項物業，每項涉資4至5億元。（資料圖片）

廖偉麟

辣招後投資者計劃或吸納海外物業情況

廖偉麟同劉Sir講，政府一連串措施對買家綁手綁腳，咁啱日圓又貶值，依家睇啱大阪同東京各一件商用物業，業主每件開價都係約4億至5億元。

日本物業回報達7厘

佢仲話，最吸引係每件租金回報都有7厘，相比香港最多5厘，明顯好吸引，短期再去美國睇睇有冇其他啱心水物業。

舖壇投資者黎永滔今年中再掃英倫物業，一擲逾9億元，聽講有四名本港大學生亦跟風，佢哋原本諗住買荃灣DAN6工廈樓花細單位收租，投資額約200萬元，但最終搶唔到貨，最後畀個代理游說轉買英國曼徹斯特一個開放式住宅戶收租，由於業主提供五年租金回報保證，每年有8厘，當日即拍板買入一個近400方呎單位，涉資約63萬元。

鄧成波佐敦酒店獲斟

部分買家亦未受辣招影響，反而仲有錢賺。有代理爆料，話「舖王」鄧成波揸咗約三年嘅佐敦茂林街三號全幢商用物業，早排已改裝為酒店，依家有客出價4.3億元洽購，較三年前入貨價帳面增幅1.9倍。

另外，張姓投資者今年四月買嘅天水圍俊宏軒地下G02號舖，剛以3,980萬元「摸走」，約四個月帳面賺780萬元，賺幅逾24%，聽講「小巴大王」馬亞木好有興趣。而華懋嘅秀茂坪前金茂坪戲院尋日截標，業主意向價兩億元。

一線零售核心區租賃情況理想，部分業主更罕有將舖位透過招標搵客。名成鄺鋩話，佢哋代理標租嘅尖沙咀廣東道54至66號帝國大廈地下E、F及部分G舖，下月十八日截標。市場料月租達約700萬元。另有消息話，銅鑼灣希慎廣場38樓頂層有客出價每方呎約80元洽租，呎租勢創區內新指標，據悉洽租公司為資訊科技行業。