Fundman睇市：網絡股 趁勢炒一轉
經過上星期急升，港股似乎又失去動力，昨日大市波幅得185點，牛牛皮皮，恒指收市升9點，報21,312點，成交偏淡，得486億。內地第二季經濟數字雖然符合證券行的預期，但尋日見有外資行策略師質疑在近期出口、工業製造、內需全線走弱下，中國仲有7.5%增長是匪夷所思，筆者不才，無能力分析官方數據有幾多水分，事實近期鋪天蓋地的經濟壞消息湧現，中港股市未有再探底的趨勢，股市向來走在實體經濟之先，或者已經把不利因素反映得七七八八，但轉角位出現前，牛皮悶局可能要持續一段時間。
太陽日誌2013/7/17
綜合大行預測蒙牛業績（人民幣）
尋日有29隻股份創五十二周新高，有消息又有成交配合的新高股，包括半新股擎天軟件（01297）、蒙牛（02319）、世達科技（01282）、青啤（00168）、龍源電力（00916）、安踏（02020），唔能夠數漏嘅係基金大球場騰訊（00700），尋日見過331.6元上市新高，成交19.4億元，佔大市成交近4%，揭示阿里巴巴上市概念勢不可擋的潛台詞之外，大市真係無乜炒作故事。
短期大市焦點，係今晚香港時間八點半開始，聯儲局主席伯南克在美國眾議院金融服務委員會提供證詞，五月伯老暗示退市，七月中又嚟一個彈弓手，話即使失業率落到6.5%都唔一定要立即加息，神又係佢，鬼又係佢，即管今晚又睇吓佢開大定開細。
百度剛以10.9億美元（約84.6億港元）向近排股價炒到出煙的網龍（00777），收購手上最值錢的「91無線」57.41%股權，查實近期賓架界已盛傳網龍搭通投行，分拆這個中國最大APPs store上市，誰知突然殺出個程咬金，反而引發股價人踩人，急挫21.1%，可見唔少炒家因阿里巴巴索價愈來愈高而「諗大咗」。百度三個月之內先買手機電視服務商PPS，再掃「91無線」，無疑係為內地流動通訊行業進入4G前做部署，港股裏面唔少真偽內地手機內容供應商，或者會趁火打劫，炒番一轉都唔定。
基金重估蒙牛價值
尋日蒙牛股東特別大會，正式通過收購雅士利（01230）的建議，股價急升5.2%，報30.85元。上半年，內地人均可支配收入及零售銷售增幅令人失望，牌面計無乜理由捧零售消費類股，偏偏今年蒙牛一枝獨秀，股價累積升近四成。
本文唔止一次提到，蒙牛得中糧集團入主變身半隻國企，短短幾個月，先引入外資股東達能，繼而收購現代牧業（01117）穩定上游供應，再吞埋雅士利，全面進入嬰兒奶粉市場。雖然對即時每股盈利拉動作用好低，但有利鞏固蒙牛的乳業巨頭地位。睇番毒奶事件前，芬佬眼中的蒙牛估值達40倍PE樓上，依家來一次大規模re-rating（重估）。可惜今時唔同往日，中資股估值比五年前已大平賣，上番40倍PE樓上，看來機會唔大，但30元心理關口破咗，較樂觀大行睇緊35元左右（31.3倍PE），看來達標機會存在。
