國務院部署加快節能環保產業發展，獲政策眷顧的龍源可睇高一線。(資料圖片)

港股繼續悶局一場，恒指全日波幅僅184點，收報21,312點，升9點，成交僅486億元。指數反彈後呈窄幅上落，呢啲市況最啱二、三線股發力，加埋國策消息送上東風，繼新能源股起步後，尋日輪到光伏股接力，保利協鑫（03800）、卡姆丹克（00712）、興業太陽能（00750）升幅介乎4至6%，唔怕風險高想搵細細粒容易食嘅，隻漢能太陽能（00566）都幾靚仔，唔好走漏眼！

國務院部署加快節能環保產業發展，獲政策眷顧的龍源可睇高一線。(資料圖片)

尋日市場焦點，莫過於網龍（00777）突然宣布向百度出售「91無線」，作價約85億元。呢單交易保密功夫都算做得足，尋日傳來消息市場頗感驚訝，雖則話以網龍現時市值97億元，今次交易作價計都算賣個好價錢，但始終分拆憧憬落空，股價現反高潮，一度跌至18.6元，收報19.04元，跌21%。屈指一算，目前網龍手持現金14億元，呢次賣仔料套現85億元，照計現價再跌幅度有限，但宜留意公司如何處理所得款項，到底係派發予小股東，抑或有其他新投資項目跟尾。

中國燃氣有運行

尋日預告擬買入中航科工（02357），遂以均價4.07元買入4萬股。此外，上周翻兜嘅中國燃氣（00384）尋日曾高見8.8元，唔夠手快未能及時食胡，好在收市後見到權益披露資料顯示，原來上周北控集團入場以均價8.21元增持咗2,815萬股，今次應該有運行！

講番啲新能源股，龍源（00916）尋日終於成功突破過去兩個月嘅主要阻力位8.3至8.4元水平，高位曾見8.63元，收報8.42元，升1.5%，成交2.61億元。由於走勢剛呈突破，加上14日RSI現處60，MACD呈雙牛利好，牛叉擴闊，若短線成交配合，有條件踩油開轉快車！

睇番經營數據，今年六月公司完成發電量同比增14%，其中風電增長27%，而今年上半年累計完成發電量同比增長16%，其中風電增31%。基本上，上半年嘅營運表現穩定。隨着國務院近次常務會議表明研究部署加快發展節能環保產業，照計下半年已獲上大人眷顧嘅新能源板塊有可為。龍源係少數業務覆蓋風力、太陽能、地熱、潮汐、生物質、火力發電等業務嘅新龍源企業，現價預測市盈率約16倍，短線回吐守穩8.3至8.4元區域，可小注跟進，目標向9至9.2元推進，8元關支持未宜有失。