鰂魚涌康怡花園本月暫錄4宗成交。（資料圖片）

近排樓市吹淡風，業主取態無咁硬淨，尤其凶宅樓上樓下或左右隔籬嘅單位。劉Sir八到，鰂魚涌康怡花園一個事故單位，有個喺樓上嘅單位減價60萬元後，以590萬元，平過市價最少100萬元或約15%。代理都話，今個月上半月50個指標屋苑交投按月大減55%至202宗，拖累整體樓價都跌1.3%。

鰂魚涌康怡花園本月暫錄4宗成交。（資料圖片）

市場最新二手減價及低價個案

代理老友爆料畀劉Sir知，啱啱成交嘅康怡花園D座低層單位，建築/實用面積752/594方呎，據聞業主準備移民，所以願意大幅減價60萬元，以590萬元沽出，比起市價平最少100萬元，係近半年同類低價，建築/實用呎價約7,846/9,933元。

呢個單位點解平咁多？事緣同座低層單位多年前曾發生駭人事故，所以D座嘅低層單位普遍都有折讓。

第一城市價10%沽

而呢類單位有承接最大原因係樓價相對「平」，消息話，沙田第一城一個曾發生事故嘅同層單位，建築面積410方呎，最近都以304萬元成交，低市價足足一成咁多。

依家市況要平價盤先有承接，所以今個月交投相當靜，利嘉閣稱，50個指標屋苑上半月加埋得202宗成交，比上月同期452宗大減55%，整體樓價都跌約1.3%。上半月三個主要地區交投全線報跌，其中新界區最傷，減少57%至98宗，九龍及港島區都跌約54%及52%，成交量分別77宗及27宗。

曼山平台戶劈50萬

市況淡靜，連向來價格較穩定嘅特色單位都無情講，連錄減價成交。美聯陳達安話，荔枝角曼克頓山3座低層連平台單位劈價50萬元，以630萬元成交。中原林龍南話，北角丹拿花園5座連天台單位亦減25萬元，終以625萬元賣出。

此外，利嘉閣陳湛禧話，九龍灣德福花園I座低層4室售435萬元，係屋苑二月中後售價最平單位。祥益稱，天水圍嘉湖山莊樂湖居9座高層D室連減三口價共15萬元，售300萬元。