市場憧憬下半年機車招標活動重啟，為南車孖寶股價提供短線動力。(資料圖片)

上周兩地魚缸終有似樣反彈，展望本周初焦點不離內地公布GDP數據。究竟中央對經濟增長放緩嘅容忍度有多大，若然真係盛傳所講底線係「保七」嘅話，大概目前A股已處最壞時刻，雖然黎明前嘅黑暗最難頂，但相信喺有保有壓下，中央會採取打游擊戰略，即適時針對不同行業推出扶持政策，以避免實體經濟硬着陸。

市場憧憬下半年機車招標活動重啟，為南車孖寶股價提供短線動力。(資料圖片)

市況方面，若然短期指數靠穩，是次跌浪最先下滑嘅資源、貴金屬及內銀股，短線升勢料可持續；至於政策扶持概念，則有航運、光伏及家電。講到資源股，論「霉」，應該冇邊個板塊同煤炭股爭，但上周就連煤炭股走勢都有止跌回穩迹象，三大煤炭股神華（01088）、中煤（01898）及兗煤（01171）股價均已重上10日線，乃近兩個月首次。

鋼鐵股首選鞍鋼

此外，跌咗好幾個月嘅鋼鐵價格，近月開始喺低位見到承接，上周武鋼便將八月份鋼鐵產品銷售價格調升，乃五月以來首次調升價格行動，某程度反映供應減少之下，產品價格開始止跌，但反彈力度有多大，還需要睇鋼廠守唔守紀律，會唔會又再鬥快增產，一旦產量又再彈升，咁就難以對價格回升幅度有過分期望。幾隻鋼鐵股之中，鞍鋼（00347）係相對較好嘅選擇，短線反彈阻力喺50日線4.25元。

要追入落後股，其實上周五基建及鐵路板塊已率先起步，喺憧憬下半年機車招標活動即將啟動之下，中國南車（01766）及南車時代（03898）同升逾7%、中鐵（00390）及中鐵建（01186）同升逾8%，且有成交配合，確令人眼前一亮。老實講，中國鐵路總公司才剛成立，項目招標進度尚未明朗，呢個時候上車主要係跟風短炒，而唔係博行業復甦。

聚焦南車孖寶，論技術走勢，南車時代似乎較南車值博，皆因南車時代股價上周創下五十二周新低，但14日RSI現明顯背馳，本輪反彈下兩個阻力位分別喺20元及21.6元，10日線支持在17.8元。

順帶一提，上周四見沽出不久嘅中燃（00384）又再蓄勢向上，故立即上番車，周五股價收報8.49元，升3.2%。早前阿莊推介過嘅滬杭甬（00576），走勢亦對辦，上周五遂以均價6.4元買入3萬股，就押注其分拆故事下半年有冇進展。