紅磡海逸豪園一個車位以新高價沽出。(資料圖片)

受惠政府起動九龍東，除帶動區內住宅樓價大升，亦刺激車位連環破頂。大型屋苑藍田麗港城同紅磡海逸豪園，雙雙有車位做價刷新高紀錄。其中住宅同車位比例只係約莫八比一嘅麗港城，近期一個車位以128萬元登記成交，比對上最貴車位再高9萬元或8%，係屋苑車位新高指標。差唔多同一時間，海逸豪園有車位以195萬元新高價易手，逼近200萬大關。

紅磡海逸豪園一個車位以新高價沽出。(資料圖片)

藍田麗港城有車位以一百二十八萬元登記易手，創屋苑車位新指標。(資料圖片)

近月私宅車位高價易手個案

九龍東部分唔夠車位供應嘅大型屋苑，做價愈升愈有。據土地註冊處資料，麗港城一個地下單號B車位，上月中以128萬元登記易手，創屋苑車位價新高。上述車位○五年底購入價約50萬元，升值達1.56倍。屋苑對上一宗最貴車位成交，係今年二月錄得嘅地下另一個單號B車位，當時成交價119萬元。

需求大 買賣無限制

美聯吳紹輝同劉Sir講，麗港城規模雖然大，但車位唔多，需求都幾大。該行歐仲為話，屋苑車位買賣無限制，住戶同非住戶都可以投資同埋自用，所以咪愈搶愈高。

歐氏補充，依家麗港城車位買賣放盤大約有40個，當中以地下車位最方便最優質，但放盤只有幾個，目前叫價超過120萬元，而普通位置嘅就90幾萬起，佢話，地下車位月租約3,300至3,500元，較一般為貴，如果以高價賣咗嘅車位計，回報率約3厘；其他車位一般租金約3,000至3,200元。

海逸車位月租4500

另外，紅磡海逸豪園亦錄到車位高價成交，其中B3層雙號車位五月底登記成交價高達195萬元，料為歷年最高，原業主○七年購入價為83萬元，現帳面升值約1.35倍。翻查資料，海逸豪園年內對上一宗高價個案，係二月賣出嘅B1層單號車位，當時成交價190萬元，現時再推高5萬元。

聽美聯殷勒麟講，海逸豪園車位放盤量唔多，近年車位價格普遍都要百幾萬，視乎位置同質素而定，依家買賣放盤唔超過20個，叫價由160幾萬至200幾萬元不等，而月租則介乎3,800至4,500元。