近日匯市有兩大焦點，一是美國聯儲局之退市時間表，自從聽完伯南克同埋一班聯儲官員你一言我一語後，其實都搵唔到線索，不如自己睇經濟數據搵答案。

上個星期美國經濟數據好，提早退市的預期就即時強化，到上周四一個稍為差的美國GDP數據，又令到退市諗法Hold住先，美元即時腳軟。一日未有明顯答案前，這些短線噪音都會決定美元升跌，但只要其他央行繼續量寬同減息，美元強勢格局未變。

至於另一主題，當然係日本股、匯及債市大幅波動，最主要原因係債息抽上接近1厘，令市場擔心日債危機會出現。日本央行行長黑田東彥又即刻第一時間現身，話之前推出的量寬超過九成的資金用來買債，每月仲會分8至10次嚟買，明顯想穩定市場情緒。

日本仍處通縮期

至於日本仲係通縮緊，數字仲要連跌六個月，即係話過去半年大吹大擂話兩年內見2%通脹率，似乎央行目前未交到功課，令市場有憧憬日本會唔會仲有咩新舉動，而央行同政府有同一目標而未見轉軚，即係日圓再跌只係時間問題。

不過，日本十年期債息仲係近0.9厘，未見明顯回落下，短線要急跌有難度，預期美元兌日圓有機會先行調整，甚至可能去番97至98水平，應耐心等待重新入市買入美元兌日圓的良機。