英鎊兌美元走勢

聯儲局有關退市的爭論，成為了近兩星期匯市走勢的主軸。伯南克繼續模棱兩可，令市場未敢將美元推得太高。英鎊反彈至1.56後就反覆下跌，之前好消息已經完全反映，四月零售銷售月率再次大跌1.4%，而五月央行會議紀錄反映，即將卸任的行長金恩連續四個月尋求擴大刺激政策落空，因為大部分委員都擔心通脹升溫，連續四次以6:3的票數否決再加大量寬。四月份通脹由2.8%急跌至2.4%，創下○九年底以來最低水平。

英鎊兌美元走勢

市場即時解讀為未來英倫銀行繼續QE機會上升，不過矛盾嘅地方在於短期擴大QE機會又唔高，因為候任英倫銀行行長卡尼七月一日先上任，預期金恩餘下嘅日子會得過且過，令卡尼新上場可有更大自由度同靈活性推新措施。

技術上，雖然美元今年上升的大方向未變，不過短線要進一步急速上升，機會似乎亦不高，因此雖然英鎊中線仍有跌至1.48樓下之風險，不過第一季英國GDP增長唔錯，而經濟數據暗示，第二季都有機會延續呢個勢頭，例如工業產出比預期好、四月失業率同申請失業金人數雙雙下跌，連帶四月各領域PMI都有改善，所以短線英鎊未必會即時急跌，預期短線將在1.5050至1.5350間游走。