Fundman睇市：電力股睇位執平貨

日本股市繼續見獲利回吐，再插3%，但經歷大半年狂升81%之後，區區跌幅市場當佢無到。反而港股反彈，成交額卻縮到今年新低，使得昨日升市說服力大減，再睇沽空金額比上周五急跌四成二，得30.5億，沽空佔成交比例跌至7.16%，看來就連淡友都睇唔通，實行齊齊等周四結算前後至嚟過。

近期國際商品市場弱到震，商品貨幣澳元由1.04隊到落0.96，過程彈都唔彈吓，金價更係彈完即散，講到底，是市場對全球最大商品進口國中國的經濟前景，投下不信任票所致，製造業需求放緩趨勢未見底，這點由滙豐編制的中國採購經理指數（PMI）上月跌穿50盛衰線來看，雖不中亦不遠。

落後板塊質素欠佳

假如商品唔係錯價，最近本地中資股的走勢，就更耐人尋味，資金由經濟逆境下具備較高防守能力的燃氣、電力、家電中套現，轉投大落後的工業機械、航運及煤炭股。

即使估計人行或遲或早減息（可能在通脹及樓價平穩下來的下半年），但產能嚴重過剩，本身各有毛病的三個行業，業績改善空間令人懷疑。若然手上無電力或燃氣股，其實值得諗吓等基金食胡潮尾聲，終極一跌出現時準備執平貨。

大行分析員「預期」發改委會減電價2%，成為電力股近日急跌的理由，尋日仲未止瀉，潤電（00836）隊穿廿蚊關口，跌2.3%，中國電力（02380）跌3.9%，大唐（00991）跌2.3%，華能（00902）跌1.2%，現在四隻股票的一三年預期市盈率回落至9.8、8.1、8及9.4倍，即使電價真係如傳聞中減2%，股價應該已反映得七七八八。

收到風，基金仍然對潤電的合併相當不滿，暫時看來被否決機會仲係高一線，可以等EGM投票前先決定博唔博。華能是煤電比例最高的股份，對煤價下跌的敏感及受惠度最高，大唐觀感亦差唔多。

有趣是水力發電佔收入近半的中國電力，去年業績大反彈，煤炭採購成本下降幫助有限，主要是水力發電收益大幅改善，今年內地降雨量暫時高於去年，首季水電發電量按年升了七成三，母公司中國電力集團剛表示準備投資過百億人民幣，加大投資水力發電，配合國家環保及經濟可持續發展的策略，股價高位跌16%，同華能及大唐相若，莫非基金殺錯良民？睇收市幾乎跌番去五月初起步位，今浪有機掂一掂50日線，或者可以試吓擺低十格八格博吓大霧。