旗下分拆在納斯達克上市的中國手遊股價勁升，第一視頻身價亦可望水漲船高。(資料圖片)

美國同英國尋晚都休市，喺外圍缺乏方向之下，尋日港股交投淡靜，成交僅426億元，資金轉移至與指數表現未有太大直接關係嘅二、三線股。論板塊，科網及新能源股都係人氣之選，尋日提及嘅網龍（00777）高位曾見17.08元，收市升7.5%，收報16.48元。

旗下分拆在納斯達克上市的中國手遊股價勁升，第一視頻身價亦可望水漲船高。(資料圖片)

坐咗好耐嘅新晨動力（01148）尋日終於有異動，全日高位2.49元，收報2.46元，升幅達18%，成交1.13億元。收咗咁耐貨，若然能升穿2.5元，可以再睇高一線，支持位可參考尋日嘅平均成交價2.37元，去或留周內見機行事。

摩笛發功宏華炒上

頁岩氣股方面，大摩預計未來60日宏華（00196）股價將會上升，可能性超過80%，主要係過去三周股價落後恒指及同業，但盈利增長前景維持樂觀，估值吸引，故維持視之為油服股中嘅首選。摩笛發功下，尋日宏華股價飆10.9%，收報3.94元，短線主要阻力位仍然喺4元關，若能以大成交突破，追落後目標見4.5元，初步支持喺50日線3.7元，會視乎市況留意搭順風車嘅機會。

科網同新能源股呢期係炒家至愛。風電股中，金風科技（02208）眨眼經已升到上6元樓上，尋日收報6.43元，升10%。至於上月獲大股東頻頻入場增持嘅中國風電（00182），本月初由0.3元起步，踢到月中高見0.35元後現回吐，上周五觸及0.3元止跌，尋日收市報0.315元，大成交突破小旗形嘅話，目標見0.365元，跌穿0.3元止蝕。

此外，眼見金山軟件（03888）憑手機遊戲業務表現理想股價飆升，照計第一視頻（00082）冇道理甘於寂寞，事關旗下已分拆喺納斯達克上市嘅中國手遊娛樂集團，股價已由去年底今年初低位3美元回升至現價15.99美元（據去年度年報顯示，第一視頻持有分拆後中國手遊57%權益）。依家第一視頻市值20億元，而中國手遊嘅市值折合約29億元，後者嘅價格上升，第一視頻估值理應水漲船高，留意一旦成交轉趨活躍，升穿0.65至0.7元區域，維持回補年初下跌裂口位0.78至0.81元嘅目標。不過阿莊都提醒一句，炒得細價股，風險自然高啲，但見慣大場面嘅炒家，就係貪細價股快上快落，總之落得場，風險自負。