Fundman睇市：石藥繼續跑贏大市

前晚美股高收，帶動恒指尋日高開幾十點，然後內地公布CPI遠低過預期再挾一段，跟住大市大部分時間橫行，直至尾市北韓警告外國人撤離南韓嚇一嚇，恒指最後升152點，但成交仲少過前日，得573億元。

美股仍然強到無倫，道指低開再以全日最高位收市，筆者講過美股業績期升多過跌，公司及證券行先調低盈利預測，到派成績表時又會好過預期。美股連升半年都未需要喘氣，但下月調整壓力會增加，提高債務上限談判或係調整藉口。

內地三月CPI得2.1%，令人大跌眼鏡。不過，數據低雖然代表中央可以在無通脹憂慮下放鬆銀根，但人行自春節後幾乎日日進行正回購，依家差不多冇人再提減息或減RRR。但另一方面，通脹低代表消費品加價會遇到較少阻力，對企業盈利有幫助，而近期亦有多個城市召開燃氣加價聽證會。

日股未宜過分樂觀

因肉價受禽流感影響，四月CPI難免再跌，連中國CPI都係得2%左右，美國同日本以2%以上為通脹目標似乎路途遙遠，尤其日本到現在仍係通縮，而日圓呢半年已跌咗兩成，學唔少專家話齋，如果印銀紙呢招可解決問題，每個國家鬥印銀紙就唔使咁煩惱。

日圓最低跌到99.65，但日經指數微跌收市，匯跌股升呢個定律是否已經打破？日經喺二○○○年曾經升過上二萬點，但只係曇花一現，現在的日本樣樣衰過十年前，所以炒日股唔好高興得太早。

昨日好多股仔報復性反彈，通常反彈首日低殘股都會成為目標，所以煤炭股亦有人吼。睇番估值，兗煤（01171）一二年PE6.2倍、息率4.59%，但綜合大行預測一三年預測PE升到12.6倍；神華（01088）一二年PE8.9倍、息率4.3%，一三年預測PE同息率分別仍有9.3倍及4.2%，邊隻抵買唔使多講。

H7N9疫情帶來炒作誘因，但呢啲都係投機性居多，多少企業能真正從中得益成疑。其實在港股，醫藥股中不乏有基本因素支持的實力股，撇除季節性流感疫情因素，中長線亦值得投資者考慮。好似前名中國製藥嘅石藥集團（01093），自完成收購母公司成藥業務及更名後，年初股價升穿2.5元阻力後頭也不回，反覆向上，尋日更以五十二周新高3.7元收市。

其實石藥早已發現原料藥市場的周期性，令公司盈利表現波動太大，且市場為內地數大藥商壟斷，毛利率受壓，加上歐、美反傾銷行動亦令內地廠商冇覺好瞓，故呢幾年致力開拓成藥業務，並有一定規模，去年末季完成收購母公司成藥業務，佔總收入比重明顯上升。如今石藥已由原料藥股變身成兼營成藥業務的醫藥股，增長前景可測性同穩定性都得到提升，有助拉升估值，亦唔排除日後可再獲母公司注資壯大成藥業務，難怪股價表現硬淨，料可繼續跑贏大市！