股海實戰：中國無線強勢未止

港股尋日止跌回升，但交投仍然偏靜，成交額僅573億元，暫只能看待成超賣下嘅技術性反彈。正由於大市回升，新能源及環保等新興產業股繼續炒作，除風電股外，炒風延伸至頁岩氣及LED燈飾股。阿莊都係嗰句，即市細細注短炒無妨，但若然後市再冧，就有理冇理增持現金為上策。

除咗疫情因素之外，呢期地緣政治同歐債危機都有機會發展成打擊魚缸氣氛嘅罪魁禍首。至於內地股市，尋日公布嘅CPI數據減少咗對通脹嘅憂慮，A股自長假復市後表現亦勝預期，但說到底仲係要等中央處理好銀行體系同樓市風險問題，銀根先至有望明顯改善，且IPO市場亦有待重啟。

國家隊隨時出手

唯一一點令淡友對做空中國市場有所顧忌嘅，乃國家隊隨時出手。事緣匯金去年末季展開嘅第四輪入市增持已於尋日結束，預期第五輪入市行動隨時展開，所以見到上個月大行高調唱淡內銀股，但見空軍攻勢尚未至於太狂野！

回說尋日市況，電訊設備股中國無線（02369）走勢都幾靚仔，以五十二周新高2.8元收市，升幅9.3%。受惠去年3G智能手機大行其道，中國無線去年收入增95%至143億元，純利增20%至3.25億元，年內九成收入來自酷派3G智能手機銷售，喺內地3G智能手機嘅市場佔有率第四。此外，去年公司已開始推出4G FDD-LTE智能手機，並已出口到美國市場。公司亦已為TD-LTE產品作好準備，迎接內地4G商機，盈利前景展望向好。

截至去年底，其手頭現金等值12.73億元，本月初附屬獲銀行授出三年期60億人仔貸款，料有足夠資金應付業務發展。適逢今年係公司二十周年紀念，以公司往績及行業景氣推斷，預計今年收益和股價可更上層樓。

保守假設今年盈利增長兩成，現價計一三年預測市盈率約15倍。走勢上，上月下旬股價10日線升穿50日線之後展升浪，即使遇上跌市亦無阻升勢，短線回吐守穩10日線2.53元可保強勢。若中績對辦，未來兩季股價有機會反覆向上，升穿3元關的話，下一個較大嘅阻力位喺前年次季嘅3.5元水平。