投資SUN國度：補倉盤主導 反彈難持久

事後回看，過去兩日應市策略是過分保守，中資金融股肯定買不到，但既然自己無懼禽流感，當時撈底買些跌得最勁的受害股，例如航空股，其實是十分正路。由此可見，市場氣氛在那一刻的確是相當差，連自己一向戰意十足，盡量不放過任何短炒機會，居然也會退避三舍。

重點是不要自亂陣腳，走失一個低位反彈浪極之正常，在21,900點轉身再追，並非太蝕章，如果一心扮醒目以撈底為主打策略，應該一早已經輸到嘔。又或者堅持後市偏淡會再跌，便簡簡單單重新開淡倉。千萬不要將賺少啲當成輸咗，無端端心急入市想追數。

昨日的反彈是由中國通脹數據觸發，中資股整體氣氛的確有改善，可是情況依然尷尬，以價位計反彈力度不錯，成交卻太差，似乎只是低成交引發向上漩渦效應。

中資股跌得過殘而且空倉累積，一路反彈回升途中，一路有補倉盤加入。而補倉盤主導的升浪，是又快又勁卻短癮，一旦從高位回落，便多數沒有力再創另一個短期新高。

成交低的市況難言信心，主要從值博率考慮。昨日好友是放過一個大好挾倉良機，本地藍籌及兩大重磅藍籌完全未能配合攻勢，反映淡友仍有實力一守，加上中資股又相當似放煙花式的補倉盤走勢，隨時無以為繼。

趁勢買Put沽期指

既然如此，就應該偏向趁勢做淡，買Put或者沽期指，升穿22,000點止蝕，一旦失守昨日四月期指低位21,699點，便可確定大市開始再跌過，而今次應該不會在21,600點止步。

現時走勢和清明前擺明車馬山雨欲來有頗大分別，做淡失敗的機會率不算低，始終成交萎縮後容易吹無定向風。正如昨日所講，只是以小注怡情心態應戰，繼續等待更明顯趨勢。