樓市出更：樓價升浪 上月終落幕

樓價舊年開始升得快過火箭，難怪政府再出辣招抗衡。差餉物業估價截至二月底臨時數字，期間私樓售價指數按月又升咗3.1%至239.3點，係近五個月最高，唔覺連升十三個月，加埋升幅多達33.1%，又創歷來新高。之但係「新辣招」同銀行加按息終見成效，睇番代理即時數據，上月樓價升勢正式告終，按月跌約0.8%。

劉Sir知道，二月份私宅售價指數報239.3點，連續十三個月上升，按月升幅約3.1%，亦係近五個月最高，講遠少少對比九七年十月高位，更大幅高出約38.4%。至於二月份租金指數按月升0.9%至151.7點，都係歷史高位。

百屋苑實呎價跌0.8%

以地區及實用面積劃分，剔除每月成交唔夠20宗嘅單位類別，呢12類單位有10類樓價按月報升。以港島區面積753至1,075方呎嘅單位升得最勁，呎價按月增約7.1%至15,205元；其次同區面積431至752方呎嘅中小型單位亦升約4.9%至12,212元，其餘升幅就介乎0.5至4.6%。

面對樓價升勢不止，劉Sir都覺得政府推「新辣招」無錯。老友美聯劉嘉輝話，近日終於有業主擴大議價空間，睇番該行「樓價走勢圖」，上月100個主要屋苑平均實用呎價按月跌約0.8%至9,045元，終止連升十三個月嘅強勢。

西九甲廈租金季升6%

而寫字樓租金亦喺出招前繼續發力，二月份核心區甲級寫字樓租金全面上升，尖沙咀同上環/中區租金指數按月升0.99%及0.78%，報183.7及271.7點，呢兩個分區最新呎租約莫49.05及88.63元，而整體甲級寫字樓租金指數就升約1.2%至204.6點。

不過中區以外地區租金第一季升勢仲勁。劉Sir參考高緯環球報告，好似西九龍同東九龍兩區，首季甲級寫字樓租金就按季升咗6%同4.5%，呎租大約41.02同31.71元，升幅明顯多過中區超甲級及甲級商廈錄得嘅0.3%。另中原（工商舖）稱，灣仔英皇集團中心中層3室減價逾一成，售969萬元，呎價11,387元。