股海實戰：光大國際 搭順風車

美股前晚做好，加上A股回升，帶動恒指重上22,800點水平，收報23,020點，升443點，成交增至868億元，一來見第二日反彈動力未減，多咗炒家肯落場試水溫；二來尋日MSCI系列指數成分股執位，指數基金臨尾市入場掃貨，亦令成交增加。短線宜先觀望23,000點承接，呢啲水平先開恒指好倉唔划算。

政府宣布新財政年度將取消勾地制度，換言之，地主們失去主動性，要入貨就要參與政府定期賣地或招標活動。事實上，阿莊覺得勾地措施只係用嚟遮掩前朝政府放軟手腳唔做嘢，至有如今房屋供應如此短缺嘅情況出現。即使取消勾地制度後，地主們繼續採取不積極參與態度，有國家隊嘅參與（內地三大房地產企業經已喺香港買殼），港人亦唔使愁冇財主肯起樓賣樓。

地產股仍具投資價值

有股友問阿莊，地主股係咪經已冇咗投資價值，阿莊斷言否定，因為香港經濟同地產係分唔開，問題係日後呢個行業利潤率未必能如過往般高，且未來數年市場供應增加，消費者選擇多咗，地主股出品信譽質量良好，銷售自然可以跑贏同業。

講番尋日市況，反彈市升勢幾全面，電力股中，華能（00902）眨眼已升到8元。此外，業績股中信泰富（00267）股價急升7.5%，新世界（00017）亦升3.7%。

繼續聚焦業績股，光大國際（00257）公布去年純利11.23億元，按年增長40%，表現較市場平均預計嘅10.5億元為佳，難怪尋日股價隨大市向上，並以全日高位5.16元收市，升幅3.4%。阿莊早幾日都話想買呢隻股，但見股價跌穿5元所以冇行動，見尋日業績公布後走勢對辦，心思思又想睇位上車，會分兩注行事。

新能源業務值得期待

其實光國自○三年轉型環保以來，至今已有十年光景，如今發展成年賺逾十億元嘅環保企業，成績有目共睹，除咗因為發展策略迎合市場需求及政策方向之外，母公司光大集團嘅支持亦不可少，畢竟投資一門新興業務須要頗長嘅投資年期。目前，光國嘅環保能源及環保水務業務已上軌道，而新能源業務嘅增長前景亦可予憧憬，截至去年底公司共有十八個新能源項目，包括八個光伏發電項目、六個生物質能發電項目、兩個沼氣發電項目及兩個污水源熱泵項目，去年新能源業務嘅EBITDA按年倍增至2.05億元，表現值得期待。

再睇股價走勢，去年光國股價大致喺3至4元水平徘徊，今年以來呈突破，已確認升穿5元大關，相信年內股價可以更上一層樓。業績公布後大行上調估值將成為推動股價上升嘅催化劑，不妨跟搭順風車。