樓市出更：用家硬撐 又誕夾屋王

政府不斷出招為樓市降溫，但夾、居屋二手市場依然冇有怕，繼續出現創新高價成交。青衣夾屋宏福花園有高層單位啱啱以628萬元賣出，以3萬元之差，力壓何文田欣圖軒，奪得最貴夾屋單位寶座。

宏福花園向來以用家為主，由於盤源短缺，買家若然要入市，分分鐘要理想價先可以打動到業主。

宏福建呎價破七千七

劉Sir收到風，宏福花園2座高層E室，喺出招後依然有買家以628萬元承接，唔單止破咗屋苑紀錄，仲力壓市區兩大藍籌夾屋何文田欣圖軒同鑽石山悅庭軒，以成交價計，成為全港最貴夾屋王。上述單位建築/實用面積813/706方呎，建築/實用呎價7,724/8,895元，亦係宏福花園嘅新指標。

中原林振邦話，出招後，青衣區各類型住宅錄到約11宗二手成交，而全月就有約莫40宗，交投明顯放緩，但由於市場以用家主導，所以樓價續維持高位，仲未有顯著回落。

公屋買賣 3個月最旺

至於居屋市場，近期都錄到創同類高價成交，世紀21聯誠物業謝寶昭話，藍田康田苑C座中層2室，屬三房間隔，建築/實用面積639/550方呎，由於坐向東北同望遠景，質素唔錯，所以放盤只係兩日，就即以470萬元賣出，建築/實用呎價7,355/8,545元，創咗同類單位新高，原業主揸咗個單位三十二年，當時買入價只係27萬元。

另外，一月份公屋第二市場買賣成交暫時錄得約16宗，總值2,510.8萬元，兩個數字都創咗三個月新高，比舊年十二月分別升約6.7%及29.1%，期內最高價個案係黃大仙竹園北邨一個高層單位，以200萬元易手，而沙田顯徑邨中層單位同藍田德田邨低層單位，分別以190萬同189萬元賣出，係一月份登記金額第二、三高嘅同類個案。