市場徐想：置富產業 財息兼收

回顧去年，要數表現突出嘅港股板塊，一定不得不提房地產信託基金。其中置富產業信託（00778）嘅股價單單喺舊年已經升咗六成，如果計埋全年每基金單位分派收益，就真正係「財息兼收」了。

早排置富公布截至去年底止嘅全年業績，淨物業收益按年增22.8%，至7.883億元，可供分派收益按年增24.2%，至5.495億元。標青業績主要受惠於佢整體物業組合租金嘅強勁增長，當中部分係來自本身現有嘅物業推行資產增值措施後，為公司帶來10.4%物業收入淨額增長；而新收購物業──麗城薈同和富薈帶來的額外收入，則佔增長12.4%。Prof. J提提大家，新物業項目喺一二年其實只貢獻咗10.5個月，但已經有咁好成績，相信喺一三年，貢獻足12個月後，增長應該更加有睇頭。