股海實戰：比亞迪 大有「錢」途

一如預期，大笨象（00005）順利出售平保（02318）成魚缸焦點，早段市場情緒高漲，恒指曾高見23,944點，之後便回落，全日低位23,637點，收報23,685點，跌36點，大笨象同平保股價亦先升後跌，反而正大系嘅卜蜂國際（00043）及卜蜂蓮花（00121）均逆市高收。觀察尋日市況，更令阿莊有感市況猶如「強弩之末」，最好都係減少短炒，控制持倉風險，安度春節假期。

開始進入業績期，上周五見網龍（00777）係威係勢，單日升差唔多成蚊，點知尋日一個盈警，股價幾乎打回原形。尋日新能源股有追捧，其中大唐新能源（01798）急升12%，但收市後又傳來盈警，追入持貨過夜嘅又要驚一晚！

新能源股逆市呈強

近期內地主要城市空氣污染嚴重，引起社會關注，A股亦刮起「環保熱」，與環保相關嘅板塊，如防護產品、工業及汽車排放等股份輪流炒作，近日炒風去到新能源汽車，事緣內地消息指上海兩會期間新能源汽車充電設施問題入選小區議案，意味新能源汽車配套將提上一個更高嘅台階作討論。

尋日新能源股逆市走高，如華能新能源（00958）及上文提到嘅大唐新能源均升逾一成；中國風電（00182）升6.7%；最近透過旗下公司入股中外合營混合動力及純電動客車生產商嘅濰柴動力（02338），股價亦升1.3%。

講到新能源汽車，阿莊都係屬意比亞迪（01211）。舊年十一月本欄曾經品評過比亞迪，指其電動車業務成功與否，國策支持至為重要，若然有更多公務車選用電動車，政府配合增設電動車充電站，甚而為電動車消費作出合適嘅補貼措施，發展有望加快。畢竟汽車並唔係手工藝品，做廠只有做大產銷規模才有「錢」途！

再講，去年比亞迪業績差嘅因素，已反映喺股價上，而比較基數低，亦為今年業績造就有利條件。股價方面，已由去年十一月17至18元水平升到上今年一月高位見27.5元，足以證明市場看法有所改善。早前有內地傳媒引述公司主席王傳福話，今年將會係公司二次騰飛之年，並會以新技術作為支撐點，且看公司能否把握時機展示實力。

走勢上，由於十二月下旬至一月中旬股價累積升幅逾三成，依家抖緊氣，建議待回落至24至25元水平整固過後，再睇位入市。若然產業有利好措施出台，中線股價有望反覆叩30元大關。