樓市出更：半契樓夠筍逢賣必搶

住宅樓價連番破頂，以「筍價」為賣點嘅另類物業，成為資金爭奪目標。早前西營盤有半契住宅推出拍賣，即被多名投資者瘋狂搶高逾一倍成交，投資氣氛情緒高漲，嚟緊銅鑼灣希雲街再有一伙開價不足百萬嘅「半份業權」舊樓拍賣，勢再掀起一輪搶奪戰。

劉Sir近日同代理老友傾開，話呢類「半份業權」另類單位涉資額細，而且唔少位處鬧市，甚具優勢，因而成為投資者熱捧對象，而過咗農曆新年之後，銅鑼灣希雲街禮雲大廈，就有個呢類「半份業權」單位，透過私人拍賣行推出拍賣，近期已收到唔少查詢。

禮雲不交吉 實呎5799

上址位處禮雲大廈高層，以不交吉狀況推出，單位實用面積約338方呎，註明只售單位二分之一業權，拍賣開價98萬元，若以該單位100%業權計，每方呎實用售價約5,799元，都咪話唔吸引。

佢仲話，物業鄰近銅鑼灣購物中心區，佔盡地利優勢，目前一個擁100%業權嘅同類單位，市值近500萬元。睇番大廈資料，禮雲大廈喺五九年落成，樓齡已經約五十四年，收購潛力可謂非常優厚。

買家淡定 租金分一半

事實上，呢類另類物業甚受投資者歡迎，早兩個月亦有兩項半份契住宅拍賣易手，分別以72萬元及80萬元開價拍賣，結果吸引多名投資者出價爭奪，其中西營盤第一街一個半契唐樓，以200萬元成交，比開價高出1.5倍，以單位100%業權計，實用呎價超過8,500元。

不過，由於單位現狀不交吉，有可能係兩名業權人士聯名擁有，現時亦有人居住，新買家未必可以登門入室享有使用權。

另一方面，劉Sir上次同買入西營盤半契樓嘅買家傾過，佢話雖然買入嘅物業亦係「不交吉」，但知道另一半業權人係正經人家，會透過律師向現有住客收番市值租金一半，所以唔擔心引起糾紛。