樓市出更：買家搶盤奇招盡出

樓市旺起來，想買樓一啲都唔易，惟有各出奇招自救，見盤即搶；其中一項新招就係大手落訂，屯門市廣場有買家驚業主會反過來賠訂唔賣，買樓時加訂到10萬元；另除咗高價搶盤招數外，就係無睇樓照掃，藍田滙景花園有「辣招盤」無睇樓，都有買家以約540萬元買入自用。

祥益袁思賢同劉Sir講，呢排客就多，但盤好少，好似屯門市廣場雖然話有過百個放盤，但有鎖匙睇到樓只得三、四間，要入市除咗要唔睇樓、決定要快之外，過往買家只會落3至5萬元訂，但依家市旺驚業主會賠訂，有買家醒到識加大訂金，好似有個投資者用270萬元買入屯門市廣場2座高層C室連約戶收租，就畀咗10萬元訂金，單位建築/實用成交呎價約6,067/8,282元。

唔睇樓入市已經成為趨勢。美聯蔡詠詩講，滙景花園7座高層A室「辣招盤」，有用家樓都唔睇就用540萬元買入，建築呎價7,941元，扣埋5%嘅SSD，業主帳面都賺123萬元。

銀彈戰術買新港城

買家唔理「好醜」，見盤就搶，市場盛傳牛頭角淘大花園O座有個單位，對上嗰層曾發生事故，之前收開租，半年前收番樓一路交吉放盤都無人買，啱啱都賣咗348萬元，較銀行個估價低大約8.7%，建築呎價都有7,250元。

買家出招又點少得高價「銀彈」戰術，好似馬鞍山新港城呢類上車盤，世紀21奇豐趙詠欣話，屋苑L座高層7室，建築/實用面積460/338方呎，三個星期前先放盤，反價5萬元賣393萬元，建築/實用呎價約8,543/11,627元，創屋苑新高。中原方翰達指，大埔中心18座中層H室，有同區客用505萬元入貨，建築呎價7,594元，亦創同類新高。

唐明苑頻反價照買

居屋繼續被搶爆，世紀21將軍澳黃永佳話，將軍澳唐明苑C座中層4室，原本白表開價365萬元，近期先後加價兩次，最後賣375萬元，建築呎價達5,194元，創同類新高。

富誠地產陳錫金話，慈雲山慈愛苑B座高層4室單位，以綠表365萬元賣咗，建築呎價達4,403元，創綠表做價同呎價新高。