有利有幣：英鎊後市將現突破

自聖誕節過後，日圓出現一陣急跌，美元兌日圓曾由84水平急升至最高89水平，背後理由同樣是安倍晉三再次呼籲日本央行推大規模財政支出，並制訂出經濟增長策略以擺脫通縮。不過，安倍晉三做唔做到嘢，就要留到一月二十一至二十二日，睇吓日本央行行長白川方明會唔會買安倍嘅帳。

雖然白川方明卸任在即，但他跟安倍之看法並不一致，而他至少三月底前不會離開，因此寬鬆預期仍有落空的可能，因此愈接近二十二日，筆者反而認為美元兌日圓獲利平倉盤將會延續，即使長線睇淡日圓，都應該耐心等待美元兌日圓調整至85水平才入市。

想食大茶飯不如留意吓隻英鎊，短線仍然只在1.59至1.62整固。不過，自從金融海嘯時英鎊由2.11急跌至最低1.35水平後開始，英鎊曾經反彈至1.70，之後整整三年英鎊匯價未曾擺脫1.35至1.70，惟每次高位比之前高位為低，低位比之前低位又高，技術上形成一個三角型，目前呢個形態已經走到盡頭，係時候要作出突破，不過爆上爆落未可預料，一旦突破1.58至1.64的區間，可以預期一個大趨勢將會成型，但對投資者來講，依家已經值得開始關注埋呢隻貨幣，一旦突破，將是繼日圓後一三年另一餐大茶飯之選。