Fundman睇市：地產股現價買得過

經歷金融海嘯，股市通街都係末日博士，大好友反而好似絕種一樣，買少見少，勉強揀，第一時間諗起長期唱好A股的中證監主席郭樹清，這位大好友尋日幾句說話，又搞到中港兩地股市鬼咁興奮。

郭樹清出席本港一個論壇，透露考慮推出第二階段的QFII和QDII，包括允許港資和外資金融機構參與RQFII，最重要是整體規模比目前大十倍，市場憧憬，○七年被叫停的港股直通車，有機會再次開動，尋日恒指收報23,413點，創二十個月收市高位。

今次會唔會歷史重演，學○七年單靠吹風，短短三個月將港股由萬九炒到三萬二點？由近期沽空佔比大市成交比例縮到得番6至7%，看好後市的比例愈來愈高，要知短期股市走勢，永遠企响群眾相反方向，最好留意大市成交，如果持續在七、八百億樓下，反映購買力已消耗得七七八八，就要小心。

星期三，梁特首上任後第一份施政報告將面世，新班子四周搵地擴大未來公營房屋供應是路人皆見。上星期，恒地（00012）四叔也出來抽水，話假如農地能免補地價，有能力建成百萬元私樓應市，這樣補貼市民上車，相信可行性甚低，可是潛台詞又係睇死政府短期無可能解決供應不足的問題。

近期幾隻地產股股價唔單止升穿推SSD 2.0及BSD前水平，仲持續向高位進發。恒指地產分類指數，目前市帳率0.95倍，僅處於歷史0.6至2倍範圍的中下限水平，筆者相信仍然有相當可觀的投資價值。因為高層惹官非，估值折讓較其他發展商歷史水平落後的新地（00016），繼續是筆者首選。

星洲辣招不遑多讓

講番唔少本地炒家及發展商，埋怨特區政府的SSD 2.0及BSD太辣，一樣面對熱錢湧入煩惱的新加坡，當地政府上周五就宣布○九年以來第七次房地產降溫措施，將稅金由5%加到同香港一樣的15%，就連永久居民首置「組屋」或私宅都要畀5%BSD。

話說回頭，特區政府出招後，港人轉去炒舖、炒工廈甚至炒車位，今次新加坡招數都幾辣，一次過仲包埋貨倉及工廈，持貨少於三年，沽貨要畀5至15%業主印花稅，堪稱是三年來打壓炒風最勁一鋪，唔知香港會唔會照辦煮碗，到時又唔知班炒家會唔會去炒會籍、遊艇、甚至今年BENZ轉款個配額？