股海實戰：中航科工 醖釀突破

內地財金官員話嚟緊RQFII同QFII額度可以增加十倍，又話會進一步優化QDII結構，適時推出「QDII2」。相關言論刺激兩地魚缸走高，滬綜指企穩2,300點樓上收市，恒指亦升149點，收報23,413點，惜成交未配合，僅775億元。照計恒指喺23,500點水平阻力非輕，且尋日升市成交未見配合，進一步顯示大市上升動力已轉弱，高追指數相關嘅重磅股真係可免則免！

記憶中，近兩年每逢提起類似「港股直通車」嘅安排，港股都如強弩之末，升多些少就進入調整市，今次有冇例外唔知道，但亦無謂因此而太勇追貨。事實上，中央為免出台政策令市場有亢奮式嘅反應，喺涉及兩地金融改革方面，會採取循序漸進嘅方式。好似最近開始搞B轉H，其實已變相試行局部開放投資港股渠道，讓內地投資者參與投資港股，相信未來諸如此類嘅試驗會陸續有來，但憧憬大規模放水就有點不切實際！

利豐前景欠樂觀

受盈警消息拖累，尋日利豐（00494）股價急挫15%。資訊科技日益發達，商人透過互聯網多了很多商貿平台，國際貿易中「買辦」嘅角色已漸漸褪色。近年利豐亦不敵洪流，業務模式有待改革，是次盈警引發基金大戶力沽，主要係兩個月前管理層與投資者會面時並未提及，突傳盈警令人頗感錯愕！似乎今年公司發展仍未見坦途，反正咁多股票可供選擇，乾脆當睇少一隻算吧！

上周五阿莊見報推介光大國際（00257）果然有料到，尋日股價升8%，收報4.51元，成交2.6億元。誠如阿莊所講，呢隻股一旦踢穿阻力區將展新升浪，尋日上晝見隻股高開後未肯回頭，遂入市追入5萬股，均價4.3元，短線上到4.6元樓上會睇位先走一轉，候回試裂口位承接再睇位翻兜，目標反覆向上見5字頭。

繼續發掘落後中資股，中航科工（02357）亦似醞釀大突破，尋日高位見3.73元，收市報3.72元，升6.5%。去年末季母公司已講明擬將中航科工視為航空產業整合平台，未來將向其注入更多資產，加上A股氣氛改善，中航科工持有多家A股附屬控股權，身價有望水漲船高。

圖表顯示，3.5元乃去年末季嘅主要阻力位，本月初一棍踢穿後，近周調整亦力守其上，尋日一支大陽燭，嚟緊幾日若繼續走高，可認確已突破阻力區，目標直指五十二周高位4.35元，50日線支持喺3.37元。