投資SUN國度：「冧巴降」重現 券商股撤退

「黃生，做吓好心喇！阿婆八十幾歲，只不過想搵個冧巴賺吓快錢，唔該你喇！」「一注獨贏太危險？咁不如畀夠三個、五個都無拘！」經過星期日投資講座的實證，可以肯定「冧巴降」已重現缸湖。

中「冧巴降」的特徵，是雙目無神，食唔安瞓唔落，朝思暮想，為的只是冧巴。自己每年都為周刊推介，當然不會無貨賣，但由贏幾倍到輸幾成都試過，怎樣夠膽實牙實齒叫阿婆買？何況今年年頭全人類睇好，可能更加值得驚。自己買細價股的策略，也由精選重倉演變成仙女散花，要畀冧巴，可能一次畀二十個才合理。

這是一個焗賭的年代，一般中產家庭身家一千幾百萬的話，只要有一兩個未出身的子女，基本上一定有未必夠使的憂慮。抗疫力低，中「冧巴降」十分正常。問題是金融市場精英雲集，要長期有得贏，風險管理、眼光、膽量及耐性缺一不可。見市旺隨意攞一個冧巴，夠運會有得贏，但疊上去遲早要還。對於一般小市民，一向建議月供收租股或者REITs，價值較難被破壞，跟貼通脹機會極高。

QDII未必有市場

昨日港股嘗試向上偷襲，但以A股升勢而言恒指是失望，再加上新加坡再出招冷卻地產市道，香港政府可能會有壓力要跟，施政報告在即，港匯近日亦轉弱，種種迹象之下，自己暫時保守一點，加強對沖。至於個別板塊，證券行股最值得撤退，內地資金成本高，投資港股吸引力有限，而且過去十年散戶在A股九死一生，所以QDII根本無大市場，應趁過分樂觀情緒減持。