樓市出更：港鐵衝刺天水圍好事近

舊年年頭政府話本年度會推出7個鐵路上蓋項目，加埋有大約1.05萬個單位，但年度內只係得西鐵元朗朗屏站（北）成功批出，供應未必可以達標，要急起直追。劉Sir就收到風，港鐵（00066）全資擁有嘅天水圍輕鐵天榮站上蓋項目會喺短期內招收意向書，項目提供大約1,600個單位，市場估值約19.6億元，新地（00016）同長實（00001）都話好有興趣。

政府講過本年度會有4個西鐵項目同埋3個港鐵全資擁有項目推出市場，但最後大圍站上蓋流標收場，成功批出嘅只有朗屏站（北）一個鐵路項目，就算嚟緊下星期一截標嘅荃灣西站六區順利批出，呢兩個項目提供單位都只係得大約1,726伙，只係佔咗當初預測約16%。

不過，劉Sir就收到風，呢個早就講咗本年度會推出嘅天水圍輕鐵天榮站上蓋項目，好大機會喺本年度完結前，來一個「最後衝刺」。

港鐵發言人話，目前正在密鑼緊鼓籌備推出嘅天水圍輕鐵站項目，會盡快邀請發展商遞交項目發展意向書。對於有消息話項目會即日起招收意向，發言人澄清話，由於技術原因唔會喺今日推出，但強調會盡快招收意向書。

長實必爭 新地研投

上述項目佔地大約19.6萬方呎，住宅樓面大約98萬方呎，提供1,600個單位，計番每個單位面積大約係613方呎嘅中小型單位。部分發展商已經向劉Sir透露對項目有興趣，長實執行董事趙國雄就話，集團喺天水圍發展多個項目，有豐富經驗，肯定會爭取參與。至於新地副董事總經理雷霆都話有興趣參與。

港鐵全資 尚未補價

老友高緯環球張翹楚就話，估計呢個天水圍輕鐵站項目每方呎樓面地價大約2,000元，估值大約19.6億元，佢估計將來開售建築呎價大約6,000元左右。

不過，呢個天水圍輕鐵站項目始終係港鐵全資擁有項目，所以補地價嘅金額都仲係未知數。