Fundman睇市：鐵礦石股毋須再睇淡

周一的平安夜半日市，恒指升34點報22,541點，即月期指輕微高水15點，收22,556點，成交由上周高峰11.2萬張，回落至4.4萬張，估計大戶轉倉的部署，已經完成得七七八八，唔使等假後復市。

今個月先後有兩宗私有化消息。國浩集團（00053）大股東郭氏家族，計劃以每股出價88元向小股東提私有化，國浩於○一年以天價向星展出售道亨銀行，多年來集中金融投資，資產負債表極為透明，故消息一出，股價從未低於88元，周一收報93.2元，比出價高5.9%，若果大股東不再提價，相信私有化成功機會近乎零。

聖誕前夕，中國鐵鈦（00893）向小股東送禮，把私有化作價由原來的每股1.72元，提高到1.93元。鐵鈦在四川經營鐵礦石礦，○九年以3.5元招股上市，之後兩年業績唔錯，由上市當年賺3.27億元（人民幣．下同），升至去年6.05億元，到今年九月底止中期業績，才倒退34%賺1.97億元，大股東趁便宜提私有化，無可厚非。

史提芬估計，內地鐵礦石需求已進入復甦周期，加上鐵鈦本身持有近9.1億元淨現金，全購並撤銷上市地位，估計實際花費可能低於10億元，難怪吸引大股東出手。而鐵鈦的私有化，亦向投資者發出一個訊號，鐵礦石行業唔需要睇得太淡，將故事伸延，中信泰富（00267）可能仲有排炒。

招商銀行有機跑出

內銀股下半年表現脫胎換骨，四大行中，工行（01398）、農行（01288）、建行（00939）及中行（03988）分別升28.7%、22.9%、17.4%及16.3%，二三線如重農行（03618）升勢更勁，升幅31.2%，民生銀行（01988）升23.7%，反而招行（03968）較令人失望，僅升13.8%。

招行第三季的業績符合預期，首三季賺347.9億元人民幣，按年升逾兩成，可惜同其他二三線內銀一樣，呈現資產質素劣化、不良貸款餘額上升的趨勢，而核心資本充足率亦稍低於同業平均，加埋估值稍高於重農行、民行，故近半年未成為熱錢博反彈首選。不過，由近日的研究報告所見，大孖沙開始睇信貸質素改善，二三線內銀如民行及招行，於未來一至兩季，有機會跑贏一線內銀，不妨多加留意。