股海實戰：錦江酒店 大戶進場

港股平安夜半日市交投例靜，新年前僅剩2.5個交易日（除夕交易日亦為半日市），如外圍冇大變化，料恒指可維持喺高位做年結。今年做股民唔易過，但亦總算好頭好尾，年尾魚缸來個鯉魚翻身，多得A股回勇，但究竟係反彈浪抑或真係見底回升，阿莊傾向睇埋明年首季表現先至下定論。

明年內地貨幣政策會以穩定中偏向寬鬆為主調，喺呢個大前提下，明年城鎮化概念股可繼續走強，如鐵路及城軌、智慧城市，以及汽車、家電和綠色環保等股份。至於傳統嘅內房股，只要調控未有「加藥」，料可維持上落格局；反觀內銀股就難以叫人安心，特別係銷售理財產品問題不容輕視，當中以較積極銷售理財產品嘅民行（01988）同招行（03968）涉及相關風險較高，投資者不可不察。

中旅好戲在後頭

文化娛樂及旅遊股屬明年中資股中相對冷門嘅板塊，但今年亦唔係毫無表現，中旅（00308）股價守穩年初起步位1.3元水平下，末季發力重上1.6元水平，本月初急升過後未肯回頭，相信好戲在後頭。另一隻值得留意嘅係錦江酒店（02006），該股最近獲社保基金減持咗14萬股，持股量降到落6.99%，背後動機係咩外人難明，反正減持量唔多，而且股價不跌反升至五十二周高，本周一收報1.44元，升2.8%，話唔定有大戶力吸貨源。

事實上，上大人話未來十年致力提高人均收入，透過城鎮化解決發展不均嘅問題，相信唔使五年，內地嘅基層勞工月入同香港基層睇齊，主要係匯率因素以及內地工資隨經濟發展而持續保持快速增長。可以預計，內地居民消費能力按年上升已成趨勢，對消閒娛樂嘅需求將有增無減，所以論行業景觀，主營酒店業務嘅錦江不愁發展機遇，就睇管理層點樣把握機遇。

再睇番業績，上半年公司賺1.67億元，同比微增1.6%。今年十月宣布喺六至十月期間沽出中航地產2,253萬股A股，預計年內出售中航地產權益可取得稅後投資收益約9,900萬元人仔，計落今年業績有保證。現價往績市盈率12倍，市帳率0.9倍，有可塑性，但交投需要持續改善。作為參考，下一個較大阻力位喺1.8元，50日線支持喺1.28元。