股海實戰：天能動力板塊首選

尋日置身魚缸，開始有啲「禾雀亂飛」嘅感覺。熱錢繼續押注國策股，光伏股成炒家樂園。尋日話保利協鑫（03800）股價上得番1.5元再落場，開市價1.51元，遂以均價1.51元買入12萬股，見下晝兩點半都喺係1.55元左右徘徊，其後大盤掃到上全日高位1.61元收市，升幅8%，成交達到9.12億元，有勢挑戰250日線1.78元，唔貪心，上到1.7元邊食胡都幾唔錯。

另外，早前叫阿莊買頁岩氣股嘅基金線人飛鴿傳書，話要睇實隻興業太陽能（00750），目標價睇20元咁話，阿莊「O」咗嘴，但都不敢怠慢，眼見股價升咗半成都照排隊，點知尾市掃到上全日高位6.93元，收報6.89元，升9.8%，惟有睇吓今日買唔買到2萬股。

繼續發掘落後股，今年首三季，鉛酸蓄電池企業利潤普遍有雙位數字增長，不過末季以來，產品價格回落、行業庫存上升，企業盈利受到不利影響。見到天能（00819）喺上月初見高位5.52元後掉頭回落，超威（00951）同理士（00842）股價都無甚表現。

為咗加快行業改革，近日工信部發布《鉛蓄電池行業准入公告管理暫行辦法》，透過提高准入門檻，加快行業結構調整，淘汰落後和產業升級，消息理應有利大型業者。論基本因素，天能當可視為板塊首選，今年上半年利潤增長八成多，本月初股價落到4.51元後反彈，尋日收報5.02元，短線若能以大成交重上50日線5.07元，可確認調整完成，再向五十二周高位5.52元進發。

超威理士可冷敲

至於超威，與天能一樣同屬行業龍頭企業，但天能已興建廢舊電池回收廠，產業鏈較完善。再睇股價走勢，超威嘅表現亦略為遜色，短線4至4.1元乃一阻力區，須有大成交配合始能作出突破。

最後講埋理士，盈收及產能規模均未及天能與超威，今年以來股價累跌近四成，尋日收報1.17元，成交增加，若然短期天能同超威表現成氣候，照計理士亦有條件炒落後。