樓市出更：食正QE4工商舖咬高價

美國第四輪量化寬鬆措施（QE4）帶動熱錢湧港，唔受額外印花稅影響嘅香港工商物業都「唔憂賣」。有代理行啱啱整咗個問卷調查，被訪逾百名工商舖業主中，有三成話放盤會加價，當中加幅喺6至10%嘅比例佔最多，達到四成，足見業主睇好後市。而舖壇資深投資者黃海明（Michael）亦話，QE4後即以約3,000萬元即睇即買灣仔一個商廈單位。

就QE4對工商舖市有咩影響，美聯工商舖（00459）上周五至本周二進行電話訪問，成功訪問咗105個工商舖放盤業主，當中有三成表示會加價，加幅喺6至10%之間嘅比例，就高佔四成，係眾加幅比例中最高，而加幅喺5%以內，同埋喺11至20%之間嘅比例都各佔約三成。

黃海明QE3後三億掃貨

有代理同劉Sir講，金鐘力寶中心2座低層單位嘅業主，本周初加價至每方呎近2萬元放盤，涉資約3,200萬元，加幅約8%。另美聯商業周永亨話，一名投資者於本月初購入嘅灣仔新銀集團中心30樓頂層，再以摸貨形式放售，叫價約1.32億元，較購入價高逾11%。

問卷仲有問業主放盤取態，有高達四成嘅業主話，會將議價空間收窄，即係變相加價。投資者Michael話，今年九月第三輪量化寬鬆措施後至今，已經共斥逾3億元買工商物業，而QE4後更即時購入上述灣仔一商廈單位。

另土地註冊處資料顯示，觀塘宏基資本大廈18樓連一批車位摸出，涉資約1.36億元，樓價約一個月升近3,000萬元。

尖沙咀舖兩周賺11%

QE4後，樓上舖炒賣獲利個案如雨後春筍，消息稱，已差唔多悉數摸出嘅尖沙咀厚福街8號H8商廈，其中一個高層全層以約3,900萬元「摸上摸」售，呎價近1.8萬元，投資者兩個星期唔夠帳面淨袋約400萬元，賺幅逾11%。

另蔡姓投資者以5,100萬元摸出跑馬地奕蔭街13號地下部分，一個月帳面速賺約970萬元。

車位近期亦熱賣，消息指出，鰂魚涌海光苑一批約60個車位以約4,800萬元連約售。有代理話，旺角窩打老道67A號地下部分及低層一批舖位以約1.28億元售，呎價約1.3萬元。