股海實戰：南航大有上升空間

炒埋呢個禮拜又到聖誕節，唔少投行朋友都經已放假，但見尋日大市成交額唔太差，都有六百幾億，恒指跌92點，收場報22,513點，叫做維持大漲小回格局。中資股繼續受追捧，尋日阿莊提到嘅中信証券（06030）同海通證券（06837）分別升1.5%及3.6%，而上周買入嘅雨潤（01068）強勢持續，收報5.71元，升3%，周內6元關前食胡冇難度！

上周魚缸炒「光伏下鄉」概念，阿莊喺上周四推介嘅保利協鑫（03800）只係回咗一日又再起步，尋日上晝「扮死」，下晝抽上到高位見1.57元，收報1.53元，升3%，走勢比想像中好，短線調整守穩1.5元樓上，擬沽出國泰君安（01788），換入保利協鑫。

光伏股跟炒要謹慎

上周光伏股異動，LED股亦曾有動靜，但一日貨仔就回頭，真明麗（01868）同達進東方照明（00515）都低收。有內地傳媒報道，LED行業明年或現倒閉潮，主要係LED產品不斷降價，但行業投資熱潮未減。總而言之，光伏股也好，LED股也好，行業供過於求嘅問題非短時間可解決，只能抱着短炒嘅心態看待，跟炒宜量力而為，且嚴守止蝕。

剛開完嘅中經會定調明年經濟要加大投資，適度增加貸款。咁聽落照計內銀股仲有可為，本月推介過嘅農行（01288）尋日回吐，收報3.73元，正觀察10日線3.56元承接，守穩其上有意沽出部分滬杭甬（00576），換入農行。

資金繼續追落後，尋日輪到航空股，東航（00670）升6%、國航（00753）升2.6%，南航（01055）升3%。月初以來油價回落，有助紓緩成本壓力，行業既已安度最艱難時刻，雖然尚未清楚明年嘅復甦進度，但相信未來兩季經營數據改善，將成為推動股價回升嘅催化劑。

睇圖表走勢，東航同國航股價10日線早已抽穿250日線，其中東航尋日股價創五十二周高，而國航再升約7%就到五十二周高位6.73元，反觀南航股價10日線剛剛才重上250日線水平，現價3.92元，與五十二周高位4.58元相比，尚有約17%上升空間，若能以大成交突破4元關，可反覆向五十二周高位推進，跌穿3.67元止蝕。