樓市出更：用家焗撐租有排漲

樓價高企唔落，搞到一啲心大心細嘅買家，焗住要租樓，支持租金不斷破頂。上個月50個指標屋苑平均呎租再升0.7%，去到25.35元，除咗已連升十個月之外，整體租金更加係連續七個月創歷史新高，依家連新界區指標屋苑平均呎租都已經突破20元，根據走勢嚟睇，未來一、兩個月中小型住宅租金升幅依然會領先大市，而今年首十一個月50個指標屋苑租金累升16.4%。

利嘉閣周滿傑同劉Sir講，50個指標屋苑上個月平均呎租已經去到25.35元，由於樓價响高位續升，加上政府出招壓市，令更多追唔到價或非本地買家需要焗租單位，估計未來一、兩月中小型住宅租金升幅將會更加顯著。

蔚藍單月租貴5.1%

上個月三個大區租金全面報升，當中以細單位集中地嘅新界區，升幅最凌厲，該區21個指標屋苑平均呎租報20.21元，按月急升1.2%，亦係史上首次突破20元關口。反而市區轉買為租情況唔算嚴重，所以租金升勢相對溫和，港島區9個指標屋苑平均呎租按月升0.5%至29.67元，相信好快會過30元；而九龍區20個指標屋苑就只係微升0.3%至25.26元。

若果剔除14個租金唔可以比較嘅屋苑，上月36個屋苑之中，有24個屋苑租金報升，佔比率67%，升幅最多係將軍澳蔚藍灣畔，單月升咗5.1%，去到24.9元；而西灣河鯉景灣及馬鞍山新港城一樣升4.1%。至於租務成交方面，50個指標屋苑上月租務成交微跌近8%至922宗。

雖然臨近年底，不過最近各區租市交投都保持唔錯，好多業主一收樓就即刻租出單位。香港置業梁啟智表示，紅磡海濱南岸6座低層J室，面積770方呎，以三房間隔，業主收樓無耐，就將單位放租，隨即有租客以月租1.8萬元承租，呎租約23.4元。

港景峯每呎撲30元

置業18岑天龍表示，尖沙咀港景峯1座中層C室，面積1,151方呎，以兩房兩廳間隔，另連儲物房，啱啱以月租3.35萬元租出，呎租約29.1元。