股海實戰：滬杭甬爆發力強

尋晚美股感恩節休市，此前港股繼續就走高，恒指尋日收市升218點，報21,743點，成交497億元。本地地主股、收租股以及內房股均有買盤吸納，滙豐中國製造業採購經理指數重上盛衰分界線之上嘅消息，亦有助穩定人心。不過，阿莊仍傾向維持上落市嘅睇法。

近期盈富（02800）沽空比率高企，向基金朋友請教，聽講係同一班專門靠做LONG SHORT賺錢嘅基金活動有關，故其沽空比率高企同後市方向未必有太大關係，更何況依家大市成交唔係特別大，冇迹象大鱷部署大單邊市。事實上，若然班大鱷真係睇淡後市，更直接嘅做法係沽期指，聽落又有道理。

中燃等回調上車

一路話見回調會考慮上車嘅中國燃氣（00384），頭也不回，尋日高位見4.99元，收報4.97元，升4.4%，真係冇緣﹗中燃將於下周三公布中績，睇吓此前仲有冇上車機會。

近期A股表現反覆偏軟，但尋日中信証券（06030）同光控（00165）股價同升逾2%。講到券商股，最近滬杭甬（00576）擬分拆旗下浙商證券喺A股市場上市，阿莊相信，此舉有助釋放其資產價值，有利股價表現。

還記得○六年金信證券嘅資產被大股東挪用而出問題，滬杭甬為咗避免攞唔番嗰五億幾人仔國債投資，硬着頭皮透過旗下上三公司向金信注資重組，並將之易名為浙商證券，誰知無心插柳，發展至今，浙商已具備喺內地獨立上市嘅條件。

受早前官方整頓收費公路政策同免收費措施影響，滬杭甬估值未見太吸引，但積極推進分拆浙商證券事宜一旦落實並成功套現，將有利加快收購公路資產。其股價本月初升穿5.7元後未見太大回吐壓力，一旦有好消息配合以大成交向上突破6元關，爆發力不容忽視。建議逢回吐收集，50日線支持喺5.57元，中線目標挑戰6.8至7元阻力區。