Fundman睇市：中海油追落後

當美國總統選舉未揭盅前，昨日標普期指上晝一路跌，最多跌11點；但奧巴馬中午有驚無險勝出後，標普期指即時醒神晒。恒指上晝同樣冇厘精神，但下晝就愈升愈有，並以全日最高位22,099點收市，上升155點，成交亦增加至640億元。

奧巴馬連任總統，代表未來四年沿舊路走，QE可以繼續玩落去，但共和黨繼續控制眾議院，財政懸崖將成下一個焦點。劇本可能會係兩黨再度為削赤及減稅等問題爭拗不絕，到最後關頭又為免選民遷怒而各讓一步大團圓結局；但財政懸崖上談判桌後料影響美股，所以相信市場興奮情緒都唔會持續好耐，而香港的股民最有興趣知道的，仲係熱錢嘅去留。

大選過後另一放下心頭大石的是伯南克，市場估計其甚可能在明年一月底約滿後續任聯儲局主席，換言之，QE可繼續無限化，甚至有QE4或買國債，熱錢仍舊亂竄。所以奧巴馬當選被視為有利商品價格，昨日金飾股和金礦股率先上揚，航空股因懼怕油價及人民幣走勢逆轉而回落，但石油股則尚算升幅輕微。

兩大石油石化股─中石油（00857）及中石化（00386）最快可能明日要降成品油價，中海油（00883）則純睇油價，但能否買得成尼克森則成為不明朗因素。雖然集團出價已賣大包，不過加拿大為免被指見錢開眼助長中國崛起，所以一再將交易延遲，但瑞信相信交易最終會獲批，因為美國顧住開採頁岩氣，已買少咗好多加拿大能源，所以政府亦鼓勵外資參與能源業。

購尼克森料快成事

講到最hot名詞頁岩氣，有分析話中海油買尼克森其一原因是對方擁有開採頁岩氣技術，現時開採頁岩氣主要由中石油及中石化進行，據報兩間公司三年內可獲得中央補貼逾17億元人民幣。中海油早前公布成立合營公司開採煤層氣，實行人棄我取，有消息稱中央短期亦會提高開採煤層氣補貼，補貼金額甚至會高過頁岩氣。

中海油早前披露全年產油可以超標，瑞信認為如果收購尼克森搞掂，明年產量可激增33%。至於國際油價無疑要睇美元及經濟狀況，所以中海油與大市同步性（beta值）相當高，但近期明顯跑輸大市；當收購尼克森的不確定因素消除後（如美國大選），中海油有機會一追落後。