股海實戰：信義玻璃質素秤先

奧巴馬成功連任美國總統，市場嘅不明朗因素消除。尋日選舉結果公布後，恒指止跌回升，尾市升幅擴大，以全日高位22,099點收市，升155點，成交641億元。嚟緊尚要過中國十八大一關，此前A股大致靠穩。呢幾日一於少理，繼續炒股唔炒市。

消息有指內地四部委商討挽救光伏企業，初步共識係棄小保大，龍頭股保利協鑫（03800）以全日高位1.61元收市，升幅8%；鉑陽太陽能（00566）升14%，收報0.275元；至於規模較細嘅同類股亦有理冇理跟炒，陽光能源（00757）及卡姆丹克（00712）分別升9%及7%。阿莊就認為，炒行業復甦當從龍頭股出發，皆因大企業將會係最先受惠嘅一群。

玻璃期貨落實推出

中證監表示，已批准玻璃期貨喺鄭州商品交易所上市，估計年底前便可正式推出，這對玻璃生產商係好事，事關咁樣可以增加轉移風險嘅渠道。數據顯示，內地玻璃行業每三至四年一個周期，咁照計一三年會係新上升周期嘅開始，推出玻璃期貨可謂正合事宜，相信屆時可掀炒風。

今年七月以來，浮法玻璃價格持續回升，十月份玻璃行業毛利率更創今年新高。隨着內地加快城鎮化及推動基建項目，相關股份盈利前景有望改善。

中國玻璃（03300）股價自八月底見低位0.69元後反覆回升，本周初見高位1.2元，累升73.9%；信義玻璃（00868）由九月初低位3.25元回升至本周初高位4.86元，累升幅度49.5%；洛陽玻璃（01108）股價則由九月初低位1.21元回升至上月下旬高位1.7元，累升幅度40%。中國玻璃嘅反彈幅度最大，原因之一乃係今個板塊下跌周期中，其股價累跌幅度最大，達85%。

阿莊認為，三者之中，論盈利質素當取信義，該股亦為近期首隻股價確認重上250日線嘅玻璃股，唯一不明朗係分拆光伏業務上市嘅進展；至於中國玻璃同洛陽玻璃，論人氣首選中國玻璃，洛玻多數都係等信義同中國玻璃炒得咁上下先至跟炒，故結論係，睇好玻璃股嘅話，揸就揀信義，短炒就揀中國玻璃。