樓市出更：半山入伙盤 業主寧死守

西半山多個早年發售嘅樓花新盤陸續進入收樓階段，好似入緊伙嘅蔚然，同準備收樓嘅瑧環，唔知係咪息口低兼且業主持貨能力較強，所以兩個樓盤到依家都係得兩成單位放盤，而願意蝕錢賣樓，市場更僅有一伙。

劉Sir收到風，蔚然首階段收樓，依家暫時成條街得一個鎖匙盤放緊，所以想睇現樓，真係有啲難度；而第二階段嘅收樓安排，聽講最快要到周末先開始，區內代理就希望可以收多啲鎖匙盤，事關始終有樓睇嘅鎖匙盤，叫價都可以高啲。

代理朋友就話，蔚然喺市場暫時有約莫24個二手放盤，平均叫價要2.13萬元一呎，成個市場暫時得一個低層單位業主肯蝕錢走貨，其他單位叫價都依然堅挺，守住喺高過購入價嘅水平。

講番呢個低層單位放盤，業主係用私人名義揸住，由於單位喺舊年九月先同發展商太古地產（01972）買番嚟，所以仲要畀樓價5%嘅額外印花稅（SSD），業主就有兩個放盤價，如果要業主包埋SSD賣，單位叫價約莫要3,100萬元，如果SSD係新買家畀，叫價平少少，嗌緊2,950萬元。

蔚然租盤每呎嗌55元

至於租盤方面，蔚然有28個放盤，叫價每方呎要成55元，價錢都唔錯，不過，可能係啱啱收樓關係，同買賣一樣，暫時市場都未發過市；另一個準備收樓嘅新盤瑧環，區內代理話，屋苑做緊最後階段清潔，發展商豐泰地產應該會喺短期內會發信通知業主收樓，而瑧環暫時有17個二手租務放盤，叫價都成53元一呎，拍得住蔚然嘅叫租水平。

講到瑧環買賣放盤，暫時有25個，叫價都要2.15萬元一呎，不過，由於呢個屋苑單位面積比較細，當年入市嘅買家好多都係睇準佢「細細粒」，價錢唔貴又好租，所以買賣放盤即使停滯無成交，業主都好少理，咁又係，政府啱啱出完辣招，都要消化一下，放售暫時賺唔到錢，收住租都仲得。